"(...) Dia tahaka ny nitiavan'i Kristy ny fiangonana ka nanolorany ny tenany hamonjy azy (...) mba horaisiny ho an'ny tenany izany ho fiangonana malaza tsy misy pentimpentina, na fiketronana, na izay toy izany, fa mba ho masina sady tsy misy tsiny izy." - Efes. 5:25,27.
Mofon’aina:
Mitondra ny anarana Kristia-nina isika, ka aoka mba ho marina eo anatrehan'izany anarana izany. Ny maha-Kristianina dia midika ho fanahafana an'i Kristy. Midika ho fanarahana Azy amin'ny fandavan-tena izany, fanandratana ny Fanevan'ny fitiavany, fanomezam-boninahitra Azy amin'ny teny sy ny asa tsy misy fitiavan-tena. (...) Tsy nisy fiheverana momba ny tena teo amin'ny fiainan'i Kristy (...). Nitafy ny toetsika Izy, ary niaina fiainana feno fanoloran-tena tanteraka ho an'izay mahasoa ny hafa. (...)
Tokony haneho ireo toetran'i Kristy ny Kristianina, eto amin' ity tany ity - tontolo izay anjakan'ny heloka sy ny faharatsiam-pitondrantena. ( . .. ) Irin' i Kristy ny haneho azy ireo "tsy misy pentimpentina, na fiketronana, na izay toy izany" eo anatrehan'ny Ray (...).
Tamin'ny halehiben'ny fitiavany no nanoloran'i Kristy ny ainy ho antsika. (...) Rehefa feno ny fanoloran-tenantsika, dia azon'i Kristy tontosaina ny asa efa natombony ho antsika tamin'ny nanolorany tanteraka ny Tenany. Amin'izay vao hotanterahiny amintsika ny famerenana antsika amin' ny laoniny tanteraka.
Nanolotra ny Ainy ho fanavotana ny taranak'olombelona i Kristy, mba hananan'izay rehetra mino Azy fiainana mandrakizay. Handray avy amin'ny Mpamonjy ny fanomezana sarobidy indrindra ireo izay mankasitraka izany sorona lehibe izany - fo madio. Fanandramana sarobidy lavitra noho ny volamena na ny volafotsy sy ny vatosoa no azon'izy ireo. Miara-monina amin'i Kristy any amin'ny fonenana any an-danitra izy ireo, ka amin'ny firaisana Aminy no ifaliany amin'ny fiadanana sy ny fifaliana (...). Tia Azy amin'ny fo sy ny saina ary ny fanahy sy ny heriny izy ireo, satria tsapany ny maha-lova novidin'i Kristy azy tamin'ny Rany. (...)
Heverinao ve fa tsy manome tombambidy ireo izay miaina tanteraka ho Azy i Kristy? Moa ve ianao mihevitra fa tsy mamangy ireo izay tahaka an'i Jaona ilay malalany Izy, izay tany amin'ny toerana sarotra sy feno fitsapana noho ny Aminy? Hitany ireo izay mahatoky (...), ka hazoniny mba hiray Aminy; ampahereziny sy atanjahiny ireny. - TDG, t. 159.