Vakio ny Mar. 10:46-52. Nanao ahoana ny fihetsik'i Bartimeo rehefa nandalo i Jesôsy?
Hatreto, afa-tsy tamin'ny toe-javatra vitsy monja, dia nilaza tamin'ny olona i Jesôsy mba tsy hilazalaza ny amin'ny fahagagana ataony sy ny maha-Izy Azy. Ato amin'ity tantara ity, raha vao niala tao Jerikô i Jesôsy dia nisy mpangataka jamba iray teo amoron-dalana nandre fa injany i Jesôsy avy any Nazareta, ka niantsoantso hoe: "Ry Jesôsy , Zanak'i Davida ô, mamindrà fo amiko!" — Mar. 10:47. Mifanaraka tsara amin'ny maha-boky manala sarona ny tsiambaratelo ny bokin'i Marka ny nataon'ny vahoaka, izay niteny mafy ilay jamba mba hangina, kanefa sasa-poana izy ireo nampangina azy.
Tsy nanaiky i Bartimeo fa vao mainka niantsoantso mafy hoe: "Ry Zanak'i Davida ô, mamindrà fo amiko" — Mar. 10:48. Ny teniny dia nanambara ny finoana sy ny toky nananany fa i Jesôsy no Mesia ary mahay manasitrana azy. Tamin'ny andron'i Jesôsy, ny fiantsoana hoe: "Zanak'i Davida"dia mivoy hevitra roa: 1) ny fametrahana mpanjaka iray eo amin'ny seza fiandrianan'ny Isiraely (ampitahao amin'ny Isa. 11; Jer. 23:5,6; Jer. 33:15; Ezek. 34:23,24; Ezek. 37:24; Mika 5:2-4; Zak. 3:8; Zak. 6:12), ary ny hoe: 2) ho mpanasitrana sy mpandroaka demonia izany olona izany.
Dia nijanona i Jesôsy ka nampiantso ilay jamba. Misy heviny ny nanarian'ilay jamba ny lambany raha nanatona an'i Jesôsy izy. Nosokajiana ho iray laharana amin'ny mpitondratena sy ny kamboty ny jamba tamin'ny andron'i Jesôsy, dia izay ambany saranga indrindra eo amin'ny fiarahamonina. Olona mahantra sy fadiranovana indrindra izany. Ny Iamban'ity lehilahy ity dia naneho ny hany fiarovana ho azy, koa ny nanariany izany dia maneho ny finoany fa hanasitrana azy i Jesôsy.
Tsy nandiso ny fanantenany i Jesôsy. Eny tokoa, na iza na iza nanatona sy nila vonjy taminy dia nahazo izay nilainy mandrakariva. Mitovy amin'ilay fanontaniana napetrany tamin'i Jakôba sy i Jaona ao amin'ny Mar. 10:36 no napetrany taminy: "Inona no tianao hataoko aminao?" — Mar. 10:51. Tsy nihambahamba ilay jamba nangataka ny mba hampahiratina, ary dia nositranin'i Jesôsy niaraka tamin'izay izy. Dia nanaraka an'i Jesôsy teny an-dàlana izy.
lo tantara io no mamarana ilay fizarana miompana amin'ny fanofanana ny mpianatra, izay nanomboka tamin'ny fampahiratana jamba iray koa (Mar. 8:22-26). Ireo tantara roa manomboka sy mamarana ny fanofanana ireo dia manambara fa ny maha-mpianatra dia mitaky ny fananana fijery amin'ny maso vaovao, izay mety hanjavozavo amin'ny voalohany, saingy manaraka hatrany an'i Jesôsy eo amin'ny lalana izay soritany.
Tamin'ny fomba ahoana no efa niantsoantsoanao koa hoe: "Ry Jesôsy, Zanak'i Davida ô, mamindrà fo amiko!"? Dia inona no nitranga, ary inona ny lesona noraisinao avy amin'izany fanandramana izany?