"Aza gaga noho ny nilazako taminao hoe: Tsy maintsy hateraka indray hianareo." Jao. 3:7
Mofon’aina:
Apetraka matetika ny fanontaniana hoe: nahoana no tsy misy hery loatra ao amin'ny fiangonana? Nahoana no tsy hita ao ny toe-panahy araka an'Andriamanitra izay sarobidy tokoa? Izao no anton'izany: tsy voatandrina araka ny tokony ho izy ny fitakian'ny Tenin'Andriamanitra; tsy tiavina amin'ny fitiavana ambony indrindra Andriamanitra, ary tsy tia ny namantsika tahaka ny tenantsika isika. (...) Aoka hiseho ny fankatoavana ireo fitsipika roa napetrak'Andriamanitra ireo dia tsy hisy fifandirana intsony ao am-piangonana, ary hisy firindrana ao amin'ny mpianakavy. Ivelambelany fotsiny no anatanterahan'ny maro izany ka ny fiseho ivelany no manjary maka ny toeran'ny asan'ny fahasoavana ao anaty. (...) Ny saina fotsiny no voaovan'ny fampianaran'ny fahamarinana fa ny tempolin'ny fanahy kosa tsy mbola voadio amin'ny sampiny. (...)
(…)Tsy hita eo amin'ny mambran'ny fiangonana ny fifandraisana velona amin'Andriamanitra izay tokony hananany mba hahafahany mamabo fanahy avy amin'ny maizina ho amin’ny mazava. Aoka ho tsara ny hazo dia ho tsara ny voany. Manan-danja ho an'ny toe-panahy araka an'Andriamanitra ny fiasan'ny Fanahin'Andriamanitra ao am-po. Tsy maintsy mandray izany ao am-po ireo izay manaiky ny fahamarinana ary mamela Azy hanadio ny fony, izay izy vao afaka hitandrina ny didin'Andriamanitra (...).
Tsy dinihina araka ny tokony ho izy ny Baiboly ary tsy atao fitsipi-piainana. Raha mba narahintsika tsara ny fampianarany ary nataontsika fototra iorenan'ny toetra, dia ho tafajoro ny fanahy ka tsy hisy raharaham-barotra na raharahan'izao tontolo izao hampihozongozona azy. Ho tafajoro amin'ny andron'ny fitsapana sy ny zava-tsarotra ary ny loza ny toetra voavolavola tahaka izany sy tohanan'ny Tenin'Andriamanitra. (...)
(...) Osa isika, ary maro loatra no tsy mandray andraikitra eto anivontsika satria tsy manana fifandraisana amin'Andriamanitra; tsy mitoetra ao anatiny ny Mpamonjy ary tsy tsapany ny fitiavan'i Kristy izay vaovao isan'andro. Tsy misy fifandraisana eto an-tany mafy orina tahaka izany Fitiavana izany anefa, ary tsy misy na inona na inona azo ampitahaina aminy. - RC, t. 208.