"Fa Andriamanitra, Izay manankarena amin'ny famindrampo, noho ny halehiben’ny fitiavany izay nitiavany antsika, na dia fony mbola matin'ny fahadisoana aza isika, dia nahavelona antsika niaraka tamin'i Kristy." - Efes. 2:4,5.
Mofin’aina:
Ny fo manaiky ny fifehezan'Andriamanitra feno fahendrena dia hatoky ny fomba fitantanany rehetra (...). Ho avy hanakivy ny fakam-panahy, kanefa inona ny soa azo raha milefitra amin'ireny fakam-panahy ireny? Mahazo tombony ve ny fanahy amin'ny fimonomononana amin' Ilay hany loharanon'ny heriny? Mamikitra tsara ve ny vatofantsika? Ho tafajoro ao anatin'ny aretina ve? (...) Mamikitra mafy ny vatofantsika! Fantatro fa velona ny Mpanavotra Ahy. (...)
Ry Jesôsy be fitiavana, be fahari-po sy mpamindra fo ô, mankalaza Anao ny fanahiko! Fa afaka mijoro eo anatrehan'Andriamanitra masina, tanteraka ao amin'ny fahamarinan'i Kristy, Ilay Mpisolo sy Mpiantoka, ny fanahy mahantra sy tsy mendrika ary maloton'ny fahotana! Mitalanjòna ry lanitra, migaga ry tany, fa tiany ny mpanota (...). Mifaly sy mihira noho ny amin'izy ireo Izy, ary ny olona maloton'ny fahotana, rehefa avy nodiovina tamin'ny alalan'ny fahamarinan'i Kristy, dia entina eo anatrehan'ny Ray, tsy misy pentimpentina, na fiketronana, na izay toy izany intsony (Efes. 5:27). "Iza no hiampanga ny olom-boafidin 'Andriamanitra? Andriamanitra no manamarina azy." —Rôm. 8:33.
Aoka ny fanahy tsirairay osa sy ahozongozon'ny tafiotra hamikitra amin'i Kristy ka tsy hifantoka amin'ny tenany, mba tsy ho kivin'ny fahadisoam-panantenana madinidinika na ny faharavan'ny fikasany. Tsy mahaliana fatratra ve ny drafi-panavotana? (...) Naneho ny fitiavany ny olona Andriamanitra tamin'ny namoizany ny ainy ho azy! Melohin'ny lalàna ny mpanota ary entiny ho eo amin' i Kristy. Ary Andriamanitra no manamarina sy mamela ny helony.
Hiampanga antsika i Satana ary hitady fahazoan-dalana handringana antsika, saingy manokatra varavarana hidirana ao amin'ny fialofana Andriamanitra. Koa raha Andriamanitra no momba antsika, iza no hahatohitra antsika? Oh! Fahamarinana be voninahitra re izany! (...) Nahoana no tsy mitory ny fitiavan'i Kristy tsy manam-paharoa izay rehetra mino? (...)
Velona sy manjaka i Kristy. Tsy maintsy mitolona amin-kerim-po tahaka ny miaramilan'i Kristy izay rehetra novonjena; dia ho voasoratra ao amin'ny bokin'ny lanitra toy ny mpanompo mahatoky sy marina ny anaran'izy ireo. — UL, t. 377.