Vakio ny IFM, toko 79: "Vita", toko 81: "Nitsangana ny Tompo", toko 82: "Nahoana hianao no mitomany?". Jereo koa ny boky Risen: Finding Hope in the Empty Tomb (Nampa, ID: Pacific Press, 2020), nosoratan'i Clifford Goldstein.
"Naniry mafy ny hamonjy an'i Jesôsy i Pilato. Hitany anefa fa tsy afaka nanao izany izy, raha notazoniny ihany ny toerany sy ny voninahiny. Naleony nisafidy hanao sorona ain'olona tsy manan-tsiny, toy izay ho very ny fahefany araka izao tontolo izao. Firifiry no manao sorona toy izany ny foto-pinoana mba hialana amin'ny fatiantoka na ny fahoriana. Manondro lalana iray ny feon'ny fieritreretana sy ny adidy. ary manondro lalan-kafa ny tombontsoan'ny tena. Manosika mafy ho amin'ny lalana ratsy ny riaka, koa izay manao marimaritra iraisana amin'ny ratsy dia voafaoka any anatin'ny haizina matevin'ny heloka." - IFM, tt. 614,615 (ed. 2023).
"Tsy natolotr'i Kristy ny ainy raha tsy vitany ny asa izay nahatongavany; ka raha niala ny fofon'ainy dia niantso Izy hoe: "Vita". Azo ny fandresena. Ny tanany ankavanana sy ny sandriny masina no nahavitany famonjena. Natsatony teny amin'ny fitoerana avo mandrakizay ny fanevany amin'ny maha-Mpanafika mandresy Azy. Moa ve tsy nisy fifaliana teo amin'ny anjely? Niara-nihoby ny fandresen'ny Mpamonjy ny lanitra manontolo. Resy i Satana, ary fantany fa very ny fanjakany.
"Ho an'ny anjely sy ho an'ireo izao tontolo izao tsy lavo dia nisy heviny lalina ny antsoantso hoe: "Vita". Ho azy, toy ny ho antsika koa, dia nilaza izany fa tanteraka ny asa lehibe fanavotana. Nandray anjara niaraka tamintsika tamin'ny vokatry ny fandresen'i Kristy izy." IFM, t. 631.
FANONTANIANA hifanakalozan-kevitra
1. Manao ahoana ny tokony ho fomba fandraisanao fanapahan-kevitra mba tsy hanaovanao fahadisoana tahaka an'i Pilato?
2. Nahoana i Jesôsy no tsy maintsy maty teo amin'ny toerantsika, nisolo antsika? Nahoana no ilaina ny nahafatesany raha tiantsika ny ho voavonjy? Inona ireo toko sy andininy manohana ny valin-teninao?
3. Manao ahoana ny fifandraisan'ireo porofo ara-Baiboly sy ireo porofo ara- tantara mikasika ny fitsanganan'i Jesôsy tamin'ny maty? Izany hoe, inona ny porofo ara-tantara manamarina ny nitsanganan'i Jesôsy tamin'ny maty?
4. Diniho izay voalaza ao amin'ny 1 Kôr. 15:12-20. Raha toa ka miakatra avy hatrany any an-danitra ireo izay "efa nodimandry ao amin'i Kristy", ahoana no mampitombina ny hoe raha tsy nitsangana tamin'ny maty i Kristy "dia very koa izay efa nodimandry ao amin'i Kristy"? Nahoana ny tenin'i Paoly eto no manamafy ny fahamarinana fa matory ny maty mandra-pitsangany amin'ny maty amin'ny fiverenan'i Kristy?