"Jehôvah Tompo nanome Ahy ny lelan'ny efa mahay, mba hahaizako manao teny hampahatanjaka izay reraka; ampandrenesiny isa-maraina isa-maraina, eny, ampandrenesiny ny sofiko hihaino tahaka ny efa mahay." — Isa. 50:4.
Mofon’aina:
Manodidina antsika rehetra eny dia misy fanahy tra-pahoriana. (...) Aoka isika hitady ireo olona mijaly ireo ka hanao teny amin'ny fotoany hampahatanjaka ny fony. Aoka isika ho fantsona mandrakariva izay ikorianan'ny rano mamelombelon'ny fangoraham-po.
Tokony hotsaroana eo amin'ny fifandraisantsika rehetra fa misy toko voatombo-kase tsy ho hitan'ny mason' olombelona mety maty ao amin'ny fanandramana nataon'ny hafa. Misy tantara mampalahelo izay ambenana tsy ho hitan'ny maso tia jerijery eo amin'ny takila vosoratry ny fitadidiana. Voarakitra ao ireo ady maharitra sy mafy niaraka tamin'ny toe-javatra nitarika fitsapana (...) Ireo izay mitolona eo amin'ny adin'ny fiainana noho ny tsy fifankahazoana be dia azo hatanjahina sy ampaherezina amin'ny alalan'ny fikarakarana madinidinika izay tsy mitaky afa-tsy fiezahana feno fitiavana. Amin'ny olona toy izany, ny famihinan-tanana mafy sy mitondra fanampiana ataon'ny tena sakaiza dia misy vidiny noho ny volamena sy ny volafotsy. (...)
Ao koa ireo vahoaka maro miady amin'ny fahantrana (...) ary tara raha mba mahazo izay farafahakeliny ilainy hivelomana. Ny asa mafy sy ny tsy fananana, tsy misy fihatsarana azo antenaina, dia mahatonga ny entany ho tena mavesatra. Rehefa tovonan'ny fanaintainana sy ny aretina dia mita tsy ho zaka mihitsy ny vesatry ny entana. (...) Miraisa fo aminy eo amin'ny fitsapana entiny, amin'ny fahoriam-pony sy ny fahadisoam-panantenany. Hampidanadana lalana ho anao hanampianao azy izany. Lazao azy ireo teny fikasan'Andriamanitra; mivavaha miaraka aminy sy ho azy. Ampitsirio ao aminy ny fanantenana. (...)
Miaraha miasa aminy, mameno an'izao tontolo izao ny tsy fahatokiana sy ny fankahalana, fa ny mpianatr'i Kristy kosa dia tokony hampiseho ny toe-tsaina izay manjaka any an-danitra.
Mitenena amin'ny fomba ho nitenenany, miasà amin'ny fomba ho niasany. Asehoy mandrakariva ny fahatsaran'ny toetra amam-panahiny. Asehoy ny haren'ny fahasoavana izay fototry ny fampianarany rehetra sy ny fifandraisany rehetra tamin'ny olona.
Ny mpiasa tsotra indrindra, miara-miasa amin'i Kristy, dia afaka mikitika tadim-baliha izay hamoaka feo hanakoako hatrany amin'ny faran'ny tany sy feo izay hitambatra ho feon-kira mandritra ny mandrakizay. — TMF, tt. 98,99.