"Dia avy aiza ary ny fahendrena? Ary aiza no fitoeran'ny fahalalana?" — Jôba 28:20.
Mofon’aina:
Tsy maintsy hitolona amin'ny zava-tsarotra ianao, hitondra enta- mavesatra, hanome torohevitra, hanao drafitra sy hanatanteraka izany, ary hitady ny fanampian'Andriamanitra mandrakariva. Mivavaha ary miasà, miasà ary mivavaha; tahaka ireo mpianatra tao amin'ny sekolin'i Kristy, mianara amin'i Jesôsy .
Nanome teny fikasana ho antsika Andriamanitra, manao hoe: "Ary raha misy hianareo tsy manam-pahendrena, aoka izy hangataka amin' Andriamanitra, Izay manome malalaka ho an 'ny olony rehetra sady tsy mandatsa; ary dia homena azy izany. "— Jak. 1:5. Baiko avy amin'Andriamanitra ny hivorian'ireo manana andraikitra mba hifanoroany sy hanaovany vavaka mafana ho fangataham-pahendrena, izay tsy misy afaka manome afa-tsy Izy. Lazao amin'Andriamanitra ny olanareo; aoka tsy hiresaka betsaka satria fotoana sarobidy maro no very amin'ny firesahana tsy mitondra fahazavana. Aoka ny mpirahalahy hiray ao amin'ny fifadian-kanina sy ny vavaka ho fangatahana ny fahendrena nampanantenain'Andriamanitra fa homeny amim-pahalalahan-tanana. Ambarao Aminy tahaka izay nataon'i Mosesy hoe: "Tsy afaka hitarika izao vahoaka izao aho raha tsy momba ahy Ianao." Ataovy koa izao fangatahana izao; miaraha mivavaka amin'i Mosesy hoe: "Mba ampahitao ny voninahitrao aho" - Eks. 33:18. Ino na moa izany voninahitra izany? -Ny toetran'Andriamanitra. Izany no nambarany tamin'i Mosesy.
Aoka hifikitra amin'Andriamanitra amim-pinoana velona ny fanahy. Aoka ny lela hidera Azy. Aoka ny saina hibanjina ireo fahamarinana mandrakizay amim-panajana, eo am-piarahanareo miasa. Toy izany no hifanampianareo mba hanana fisainana ara-panahy. Rehefa mifanaraka amin'ny sitrapon'Andriamanitra ny sitraponareo, dia hifanara-tsaina koa ianareo; ho eo anilanareo, ho mpanolo-tsaina anareo i Kristy.
Niara-nandeha tamin'Andriamanitra i Enôka. Toy izany koa ny mpanompon'Andriamanitra tsira iray. Afaka miara-milaza amin'i Mosesy ianao hoe: "Ataoko eo anatrehako mandrakariva Jehôvah , fa eo an-kavanako Izy, ka dia tsy hangozohozo aho." — Sal. 16:8. Na mahatsiaro tena ho tsy ampy aza ianao dia ampy ho anao i Jesôsy . Raha olombelona hafa mety maty sy voafetra toa anao no ilanao saina sy anantenanao fahendrena dia fanampian'olombelona ihany no ho azonao. Raha mangataka fanampiana sy fahendrena amin'Andriamanitra kosa ianao dia tsy handiso fanantenana ny finoanao velively Izy. GW, tt. 417,418.