" Toy izany no iafaran’izay rehetra fatra-pila harena; fa hipaoka ny ain’izay fatra-pila azy izany. " Ohab. 1:19.
Mofon’aina:
Nomena asa ny olona tsirairay. Samy manan-toerana ao amin’ny drafitra mandrakizain’ny lanitra ny tsirairay. (...) Madio, mangatsakatsaka sy manana tombambidy lehibe ny fahamarinana ary tokony hampiasaina ho amin’ny fanorenan-toetra. Ireo izay manana ny fahamarinana sy manana fitiavana izany ao am-pony, dia hanao ny fandavan-tena rehetra ilaina mba hahatonga izany fahamarinana izany hanana ny toerana voalohany eo amin’ny zavatra rehetra. (...)
Misy ireo manan-kolazaina betsaka ao am-piangonana mikasika ny fivavahana kristianina nefa tokony hitandrina mandrakariva isika eo anatrehan’izy ireny satria manilika ny Tenin’Andriamanitra izy eo amin’ny raharaham-barotra ataony. Tsy eo anilany Andriamanitra rehefa ny fivarotana sy ny fividianana no resahina. Eo amin’ny faritaniny ny fahavalo ary mambabo ny fony. Atolony ho sorona eo amin’ny alitaran’ny fieremana ny firahalahiana kristianina sy ny fitiavana. Voafafa ao am-pony ny momba an’Andriamanitra sy ny lanitra ary ny lalàn’i Jehovah sy ny fitsipiny izay averimberina matetika. (...) Mivarotra ny fanahiny hahazoana tombony tsy ara-dalàna izy. Matevina loatra ny voaly manarona ny masony ka tsy mahita afa-tsy tombony azo amin’ny hosoka izy. (...) Voahaisotra tsy ao am-pony ny fahamasinana sy ny fahamarinan’Andriamanitra.
Moa ve ny vahoakan’Andriamanitra handà izany hery miasa mangina manimba izany? Hatolotr’izy ireo an’Andriamanitra ve ny fony? Moa ve izy ireo haneho famindrampo amin’ny namany? Moa ve hazonin’ny Advantista Mitandrina ny Andro Fahafito ao an-tsainy fa tsy azony atao ny miala amin’ny fahamarinana eo amin’ny fifampiraharahany amin’ny namany, ary tsaroany ve fa mahafoy an’Andriamanitra izy rehefa mandika ny fahamarinana na koa miala amin’ny fahitsiana? Tsy hitondra soa ho anao na oviana na oviana izay rehetra manala baraka an’Andriamanitra. Izay manantena ny hahomby amin’ny fandikana ireo fitsipika mandrakizain’ny fahamarinana dia mihary ho an’ny tenany vokatra izay tsy azony hojinjaina. Mametraka ny tenany eo amin’ny laharan’ny fahavalo izy ireo ary miantso faharavana ho an’ny tenany. Mety misy fotoana toa aharetan’ny fahombiazany, saingy tsy mba ho isan’ny ankohonan’Andriamanitra na oviana na oviana izy. – SeT 2:133,134.