"Ary Andriamanitry ny fadanana anie hahamasina anareo samy ho tanteraka, ka aoka harovana avokoa ny fanahinareo sy ny ainareo ary ny tenanareo ho tanteraka ka tsy hanan-tsiny amin’ny fihavian’i Jesôsy Kristy Tompontsika."- 1 Tes. 5:23.
Mofon’aina:
Miantso antsika ny Apôstôly manao hoe : "Mangataka aminareo aho, ry rahalahy, noho ny famindrampon 'Andriamanitra, mba hatolotrareo my tenanareo ho fanatitra velona, masina, sitrak'Andriamanitra, dia fanompoam-panahy mety hataonareo izany."- Rôm. 12:1.
Rehefa ataontsika fahazarana ny fomba fihinana sy fisotro izay mampihena ny tanjatsika ara-batana sy ara-tsaina, na avelantsika hahazo vahana ny fahazarana mitondra voka-dratsy toy izany, dia manala baraka an'Andriamanitra isika, satria tsy tanterahintsika ny fanompoana izay takiny amintsika. Ireo izay manjary zatra sy manome vahana ny filana tsy voajanahary hifoka sigara na hihinana paraky dia hizaka ny voka-dratsiny eo amin'ny fahasalamany. Manimba ny angovom-pitatitra ao amin'ny tenany izy ireo, ary mampihena ny herim-batana sy manimba ny herin-tsainy.
Ireo izay milaza ny tenany ho mpanara-dia an'i Kristy kanefa mamela izany izany fahotana mandoza izany hamitsaka eo am-baravarany dia tsy afaka hahatakatra mazava ny fanavotana ary tsy hahay hanombana araka ny fahamboniany ny zavatra izay maharitra mandrakizay. Ny saina izay takona sy voan'ny paralysisa noho ny zava-mahadomelina dia mora resin'ny fakam-panahy ary tsy afaka hanana firaisana amin' Andriamanitra.
Ireo mifoka sigara na mihinam-paraky dia voatarika mora foana amin'ny fisotroan-toaka. Ny androatokon'ny mpisotro toaka eto amin'ny firenentsika dia ny fifohana sigara no nisarika azy hanao izany. Ireo izay milaza fa tsy mampaninona azy ny mifoka sigara dia hahatsapa ny fahadisoan-keviny raha rarana tsy hampiasa izany mandritra ny andro vitsivitsy; ny fitatitra mangovitra, ny aretin'an-doha, ny hakizitinana, dia hanaporofo aminy fa manandevo azy io fanaranam-po feno fahotana io. Resin’i Satana ny herin’ny sitrapony. (...)
Ny ohatra nasehon'i Kristy, nandritra ny fifadian-kanina ela nataony tany an'efitra, dia tokony hampianatra ireo mpanara-dia Azy hanohitra an'i Satana rehefa avy manatona miafina ao ambadiky ny filana izy. (...) Toy izao no ahazoan'ny Kristianina antoka ny fahasalamany sy ny fahasambarany: ny fiainana madio sy milamina, ny saina mazava tsy misy pentina eo anatrehan' Andriamanitra. - ST, 6 Janoary 1876