Rehefa avy nanoritsoritra ireo fahazaran-dratsy sy toetra ratsy i Paoly, izay tokony hariana rehefa manatona an'i Kristy, dia miroso amin'ny lafiny tsara izy-toy ny fialana amin'ny maizina ho amin'ny fahazavana.
Vakio ny Kol. 3:12-14. Ahoana no anoritsoritana ny mpino, ary ahoana, araka ny hevitrao, no ifandraisan'izany amin'ireo toetra tokony "hotafiany"?
Tahaka ny Isiraely, izay nantsoin Andriamanitra ho vahoakany manokana sy haneho ny toetrany, ny mpino an'i Jesosy dia «olom-boafidin Andriamanitra» (Kol. 3:12), «masina». Tsy ny rehetra anefa no miaina araka izany antso izany. Araka ny nolazain'i Jesosy hoe: «Maro no antsoina, nefa vitsy no fidina (Mat. 22:14, ampitahao amin'ny Mat. 24:22, 24, 31). Mitovy hevitra amin izany koa i Paoly rehefa miresaka momba ny Kristianina (Rôm. 8:33, 2 Tim. 2:10). Ary. tahaka ny Isiraely, ny mpino dia «tian Andriamanitra» («malala») sy «masina (Deo. 7:6-8). Misy andraikitra lehibe miaraka amin'izany tombontsoa izany: ny «hilazanareo ny hatsaran'ilay niantso anareo hiala amin'ny maizina ho amin'ny fahazavany mahagaga» 1 Pet. 2:9. Ary amin'ny alalan'ny fomba fiainantsika ankehitriny no anaovantsika izany.
Jereo ireto toetra valo tanisain'i Paoly ireto: «Famindram-po sy fiantrana, fahamoram-panahy, fanetren-tena, fahalemem-panahy, fandeferana, (...) mifamelà heloka, (...) Ary aoka ho ambonin'izany rehetra izany ny fitiavana» -Kol. 3:12-14. Tsy mipololotra afa-tsy avy amin'ny fo miray amin' Kristy ireo toetra ireo, satria ireo dia mamaritra ny toetran'i Kristy sy ny fomba nifandraisany tamintsika. Tokony hamela heloka ny hafa isika «tahaka ny namelan'ny Tompo» ny helotsika (Kol. 3:13). Ny fitiavana no «fehin'ny fahatanterahana» (Kol. 3:14), satria ny fitiavany antsika no mamatotra antsika Aminy ary mahatonga antsika ho afaka mitia marina ny hafa (1 Jao. 4:11,12).
Misy akony eo amin'ny fifandraisantsika ireo toetra ireo amin'ny lafiny roa. Voalohany, ny fanehoana fitiavana, famindram-po, hatsaram-panahy, ary famelan-keloka amin'ny hafa dia mitondra fitahiana ho antsika sy ho an'ny hafa. Manome fahafaham-po ny mitia sy manampy ny hafa. Ary ny hafa koa, raha ny tokony ho izy, dia hamaly antsika tahaka ízany, koa mandray tsy tapaka ny famindram-po sy ny famelan-keloka avy amin Andriamanitra isika (Mat. 5:7, Mat 6:14). Faharoa, ary zava-dehibe kokoa, manome voninahitra an'Andriamanitra izany, ary mety handrisika ny hafa hino sy hanaraka an'i Jesôsy , satria maneho ny herin'ny fahasoavana avy amin'Andriamanitra izany. Tsy misy hery hafa izay afaka hanodidina ny fanahin olombelona ho manan-kery tahaka ny hery miasa avy amin'ny fiainana tsy misy fitiavan-tena. Ny fonjan-kevitra mahery vaika indrindra manohana ny filazantsara dia ny Kristianina be fitiavana sy maha-te ho tia.» - TMF, t. 313.
Manao ahoana ny fanehoanao an'i Jesôsy eo amin'ny fomba fifandraisanao amin'ny hafa, indrindra amin'ireo izay mety tay tsara fanahy aminao?