"Hianao dia Hianao irery ihany no Jehôvah ; Hianao no nanao ny lanitra, dia ny lanitry ny lanitra, mbamin 'izay rehetra any aminy, ny tany sy izay rehetra eo aminy, ny ranomasina sy izay rehetra ao aminy, ary Hianao no mamelona azy rehetra; ary ireo maro any an-danitra samy miankohoka eo anatrehanao". — Neh. 9:6.
Mofon'Aina:
Misy hatsaran-tarehy eo amin'ny fidadasiky ny lohasaha, sy eo amin' ireo vatolampy mafy makadiry mitresatresaka. Be voninahitra ireo tendrombohitra avo toa hipaka amin'ny lanitra. Ao koa ireo hazo mijoalajoala misy raviny malefaka; ny ahi-maitso, ny bokom-boninkazo vao hivelatra sy ny voniny mamelana, ireo hazo ao an'ala sy ny zava-manana aina rehetra. Ireo rehetra ireo dia misarika ny saina ho any amin'ilay Andriamanitra lehibe sady velona. Ny tsirairay amin'ny fahaiza-manao ananantsika dia vavolombelona manambara fa misy Andriamanitra velona, ary afaka mianatra lesona sarobidy indrindra momba ny Tompon'ny lanitra isika avy ao amin'ny boky mivelatry ny zavaboary.
Miitatra ny fahalalan'ny saina eo am-pandinihana izany rehetra izany, ary voasandratra ka manjary mangetaheta to hahafantatra bebe kokoa hatrany ny amin'Andriamanitra sy ny fahalehibeazany. Mifoha ao am-pontsika ny fahatahorana an'Andriamanitra sy ny fanajana Azy, ary koa ny fitiavana, ny finoana, ny toky sy ny fiankinana tanteraka amin'Ilay mpanome ny tsara rehetra. (...)
Tsy ho takatry ny saina ny halehibe sy ny voninahitr'ireo zava-mahatalanjon'ny tranon'Andriamanitra, raha tsy ampifandraisintsika Aminy sy ilay fonenam-pahasambarana efa omaniny ho an'izay tia Azy. (...) Isika miresaka an-kalalahana momba ny tany sy ny firenena samihafa; koa nahoana isika no misalasala ny amin'ny firesahana momba ilay firenen'ny lanitra, sy ireo trano tsy nataon-tanana sady maharitra mandrakizay ao? Zava-dehibe ho antsika mihoatra noho ny toerana na ny firenen-kafa eto ambonin'ny tany io (...) tany tsara lavitra any an-danitra io. Ary nahoana moa isika no tsy tokony hafana fo kokoa sy hisaintsaina ny lanitra eo am-piresahana mikasika ireo fanomezan'Andriamanitra ao amin'ny zavaboary? (...) Natao hampitoetra an'Andriamanitra ao amin'ny fitadidiantsika ireny, hampiala ny fontsika amin'ny zavatra ara-nofo, fa hamatotra azy kosa amin'ny fatoram-pitiavana sy fankasitrahana ny Mpamorona antsika. OHC, t. 250.