"Aoka hazava eo imason'ny olona toy izany koa ny fahazavanareo, mba hahitany ny asa soa taonareo ka hankalazany ny Rainareo Izay any an-danitra."— Mat. 5:16.
Mofon’Aina:
Baiko lehibe no raisin'ny fanahy tsirairay teraka ao amin'ny fanjakan'i Kristy: "Aoka hazava eo imason'ny olona toy izany koa ny fahazavanareo, mba hahitany ny asa soa ataonareo ka hankalazany ny Rainareo Izay any an-danitra". Apariaho amin'ny manodidina anao ireo tara-pahazavana mamiratra avy amin'ny Masoandron'ny fahamarinana; ampahafantaro ireo namanao manerana izao tontolo izao ireo zava-tsoan'ny fahazavana sy ny fahamarinana izay nomena anareo mitafotafo avy eo amin'ny seza fiandrianan'Andriamanitra. (...) Mandrosoa avy amin'ny fahazavana ho amin'ny fahazavana lehibe kokoa, amin'ny fandraisana taratra avy amin'Ilay Masoandron'ny fahamarinana, ary aoka ianao hamiratra bebe kokoa mandra-pahatonga ilay andro tonga lafatra. (...)
Aza afenina ny fahazavanao. Aza hazonina amin'ny alalan'ny fahotana ny fahazavanao. Aza avela hamono ny fahazavanao ny zavona sy ny aretin-dratsin'izao tontolo izao. Aza afenina ao ambany farafara na ao ambany vata famarana izany fa apetraho eo ambony fanaovan-jiro mba hahazava ny ao an-trano rehetra. (...) Mandidy anao Andriamanitra mba hamiratra ka hanagorobaka ny haizina ara-pitondran-tena eto amin'izao tontolo izao.
Betsaka no tsy mahalala izay manjo azy. Mila fahazavana izy ireo kanefa tsy mahita taratra. Mangataka fanampiana izy ireo kanefa tsy misy mamaly. Haharitra ve ny fisalasalana sy ny tsy finoana satria tsy mandray ireo taratra avy amin'i Jesôsy Kristy aho ka tsy afaka mamela izany hamiratra amin'ny hafa? (...)
Ireo ady lalina ataon'ny fanahiko amin'ny fakam-panahy, ireo faniriana lalina avy amin'ny saiko sy ny foko ny hahalala an'Andriamanitra sy i Jesôsy Kristy ho Mpamonjy ny tenako manokana ary ny hanana toky sy fiadanana ary fitsaharana ao amin'ny fitiavany dia mitarika ahy banana faniriana isan'andro hankeo amin'ny toerana ahazoan' ilay Masoandron'ny fahamarinana mamiratra eo amiko. Raha tsy misy izany fanandramana izany dia ho tojo fatiantoka lehibe aho, ary hisy fiantraikany amin'ireo mifanerasera amiko ny tsy fandraisako ny fahazavana izay tokony horaisiko (...) sy tokony hanazavako ny lalan'izy ireo. Ho fahazavana ho an'izao tontolo izao tokoa ve aho sa ho aloky ny haizina?- OCH, t. 297.