"Amin'izany andro izany, hoy Jehôvah , Tompon'ny maro, dia horaisiko hianao, ry Zerobabela mpanompoko, zanak'i Sealtiela, hoy Jehôvah , ka hataoko toy ny fanombohan-kase hianao; fa efa nifidy anao Aho, hoy Jehôvah , Tompon'ny maro."— Hag. 2:23.
Mofon'Aina:
Vatosoa sarobidin'i Kristy ny Kristianina. Mila mamiratra ho Azy izy ireo, manapariaka ny fahazavan'ny fahatsarany. Miankina amin'ny fandamalamana azony ny famirapiratany. Azony atao ny misafidy ny halamaina na hitoetra ho marokoroko. Saingy ireo rehetra nambara fa mendrika ny toerana ao amin'ny tempolin'i Jehôvah dia tokony hilefitra amin'ny dingan'ny fandamalamana. (…)
Izao no lazain'i Kristy amin'ny olombelona: "Ahy ianao. Novidiko ianao. Mbola vato tsy voapaika ianao izao saingy raha mipetraka eo am-pelatanako dia halamaiko ary hanome voninahitra ny anarako ny fahazavana izay hamirapiratanao. Tsy misy olona handrombaka anao eo am-pelatanako. Hataoko harenako manokana ianao. Amin'ny andro hanomezana Ahy ny satroboninahitra dia ho vatosoa sarobidy eo amin'ny satroboninahitry ny firavoravoako ianao".
Tsy mandany fotoana amin'ny fitaovana tsy manana tombambidy Ilay Mpiasa avy any an-danitra. Ny vatosoa sarobidy ihany no halamaina ho tahaka ny lapa (...). Mafy sy mitaky ezaka io dingana io; mandratra ny hambom-pon'olombelona izany. Mikasika lalina ny fanandraman'ny olona izay heveriny ho tanteraka noho ny fiheverany ho mety i Kristy ary esoriny ao amin'ny toetra ny fanandratan-tena rehetra. Esoriny izay mihoatra ary apetrany eo amin'ny kodiaran'ny fandamalamana ny vato; tereny tsara izany mba hahafaka ny marokoroko rehetra. Dia hazoniny eo amin'ny hazavana ilay vatosoa, ary hitan'ny Tompo ny taratra avy aminy ka ambarany fa mendrika ny ho hita ao amin'ny fitoeram-piravaka izy. "Amin'izany andro izany, hoy Jehôvah , Tompon'ny maro, dia horaisiko hianao (...) ka hataoko toy ny fanombohan-kase hianao; fa efa nifidy anao Aho, hoy Jehôvah , Tompon'ny maro." Isaorana anie, na dia mafy aza, ny fanandramana izay manome tombambidy vaovao ny vato ka mampamiratra izany amin'ny famirapiratana velona.
Tsy hamela na dia iray aza amin'ireo mpiasany tso-po ho irery Andriamanitra ka hiady amin'ny fahasarotana lehibe ary ho resy. Tehiriziny ho vatosoa sarobidy ireo rehetra manana fiainana miara-miafina amin'i Kristy ao amin'Andriamanitra.- OHC, t. 322.