"Ny marina hamololona tahaka ny rofia; hisandrahaka tahaka ny sedera any Libanona izy." — Sal. 92:12.
Mofon’Aina:
Ampitahaina amin'ny sederan'i Libanona ny Kristianina. Novakiko fa tsy mianina amin'ny fandefasana faka fohy vitsivitsy ao amin'ny tany lonaka io hazo io. Faka matanjaka no alefany lalina any anaty tany ka milentika lalindalina mba hitady famaharana mafimafy kokoa izany. Ary ao anatin'ny tafio-drivotra mafy mitsoka dia mijoro izany, hazonin'ireo faka maro misandrahaka ao ambany.
Toy izany no mahatonga ny Kristianina hamaka lalina ao amin'i Kristy. Manana finoana an'ilay Mpanavotra azy izy. Fantany izay inoany. Resy lahatra tanteraka izy fa i Jesôsy no Zanak'Andriamanitra sy Mpamonjy ny mpanota. (...) Milentika lalina ny fakan'ny finoana. Ny tena kristianina, tahaka ny sedera any Libanona dia tsy maniry eo amin'ny tany malemy fa mamaka ao amin'Andriamanitra, miraikitra eny an-tsefatsefaky ny vatolampy eny an-tendrombohitra.
Raha mivelatra ny Kristianina ary mitombo dia tokony hanao izany eo anivon'ny olona tsy mahalala an'Andriamanitra izy, eo anivon'ireo fanesoana sy fanimbazimbana. Tokony hijoro mahitsy toy ny hazo rofia any an'efitra izy. Mety ho toy ny varahina ny lanitra, mety handavo ny fakan-drofia ny fasika any an'efitra ary hivangongo manodidina ny vatany. Na izany aza dia miaina toy ny ravina maitso, tsy mba malazo ary matanjaka eo anivon'ny fasika mandoro any an'efitra ilay hazo. Esory hatramin'ny fakan'ilay rofia ny fasika dia ho hitanao ny tsiambaratelon'ny fahavelomany; mivarina any amin'ny lalina izy, dia ny rano miafina ao amin'ny tany.
Tahaka ny hazo rofia mivelona amin'ny alalan'ny loharano velona, ka maitso sy mamony eo anivon'ny tany efitra, dia toy izany koa ny Kristianina, afaka manovo harem-pahasoavana avy amin'ny loharanom-pitiavan'Andriamanitra, ka mitarika ireo fanahy reraka, feno fanahiana ary efa ho faty any amin'ny tany efitry ny fahotana ho eo amin'ny rano azony sotroina sy ivelomana. Mitondra ireo namany ho eo amin'i Jesôsy mandrakariva ny Kristianina ka manasa azy hoe: "Raha misy olona mangetaheta, aoka izy hanatona Ahy ka hisotro." Jao. 7:37. Tsy mandao antsika na oviana na oviana io loharano io; azontsika atao ny manovo ary manovo hatrany. — OHC, t. 331.