"Fa izay maharitra hatramin'ny farany no hovonjena." — Mat. 24:13.
Mofon'Aina:
Tsy misy heviny ny fivavahana mifototra amin'ny tena, fa Andriamanitra tsy mankasitraka ny marimaritra iraisana. (...)
Ravin-damba mafy, misy kofehy maro tsy voatanisa, notenomina niaraka tamin'ny fahaiza-manao sy ny hakingana, ny fivavahan'i Kristy. Ny fahendrena avy amin'Andriamanitra ihany no ahazoana manenona io lamba io. Rehefa mitoky amin'ny tenantsika isika dia mampiditra kofehim-pitiavan-tena ao ka manimba ilay tenona.
Misy karazan-damba maro izay, raha vao jerena, dia toa tsara saingy tsy maharitra amin'ny fizahan-toetra. Tsy mitoetra ny lokony fa mihavasoka. (...) Ny lamba toy izany dia tsy mahazaka ny fikirakirana mafy ary tsy manana tombambidy.
Toy izany koa ny fivavahana. Rehefa tsy maharitra amin'ny fizahan-toetra ny rojo sy ny tenona dia tsy manana tombambidy ny akora nanamboarana azy. Ary tsy amin'ny fiezahana hanampina ilay lamba tonta amin'ny tapa-damba vaovao no hanatsarana ny toe-javatra satria ny lamba tonta sy mora rovitra dia hiala amin'ilay vaovao, ka ho triatra noho ny teo aloha izany. Tsy ampy ny fanampenan-damba. Ny hany vahaolana dia ny hanariana ny akanjo tonta ka hitady vaovao. Ny fivavahana miorina amin'ny "izaho", izay ahitana kofehy vasoka ary koa milefitra amin'ny faneren'ny fakam-panahy dia tokony hariana ka hosoloana amin'ny fivavahana notenomin'Ilay Iray izay manana fiainana tsy ahitana fitiavan-tena.
Ny drafitr'i Kristy no hany azo antoka. Izao no ambarany: "Indro, havaoziko ny zavatra rehetra."- Apôk . 21:5. "Koa raha misy olona ao amin'i Kristy, dia olom-baovao izy."- 2 Kôr. 5:17. Tsy mandrisika na iza na iza ny Tompo hihevitra fa hanaiky fivavahana tapatapany Izy. Tsy manana tombambidy eo imasony ny fivavahana toy izany. Amin'ny voalohany dia mety hisy ampahany amin'ny tena ary ampahany amin'i Kristy ao anatin'izany, saingy vetivety dia ho tsapa fa tsy ao i Kristy. Hitombo ireo pentin'ny fitiavan-tena mandra-pahafenon'ny akanjo manontolo (...). Ny fivavahana noforonina araka ny modely avy any an-danitra ihany no hany maharitra. Amin'ny fiezahantsika hiaina ny fiainan'i Kristy no ahafahantsika miomana hiaina miaraka Aminy mandritra ireo taona mandrakizay.- OHC, t. 342.