"Mba homeny anareo, araka ny haren'ny voninahiny, sy mba hohatanjahina fatratra amin'ny Fanahiny ny toe-panahinareo." Efes. 3:16.
Mofon'Aina:
Lohahevi-dehibe ireo lohahevitry ny fanavotana, ary ireo izay mihevitra ny zava-panahy ihany no afaka manavaka ny halaliny sy ny heviny. Fiarovana ho antsika sy fifaliantsika ny mitoetra eo amin'ny fahamarinan'ny drafi-panavotana. Ny finoana sy ny vavaka dia ilaina mba hahafahantsika mibanjina ireo zava-dalina momba an'Andriamanitra. Voafetran'ny fiheverana tery ny saintsika ka tsy manana afa-tsy fahitana voafetra ny amin'ny fanandramana azontsika iainana. (...)
Nahoana no maro amin' ireo izay milaza ho mino an'i Kristy no tsy manana hery hanoherana ny fakam-panahy alefan'ilay fahavalo? — Satria tsy manana ilay tanjaka avy amin'ny Fanahy izy ao anatiny. Izao no vavaka nataon'ny apôstôly : "mba hitoeran'i Kristy ao am-ponareo amin'ny finoana, ka hamaka sy hiorina mafy amin 'ny fitiavana hianareo, mba hahaizanareo mbamin'ny olona masina rehetra ny hahafantatra tsara izay sakany sy lavany ary hahavony sy halaliny, ary hahalala ny fitiavan'i Kristy, izay mihoatra noho ny fahalalana, mba hamenoana anareo ho amin'ny fahafenoan'Andriamanitra rehetra." Efes. 3:17-19. Raha nanana izany fanandramana izany isika dia tokony hahalala zavatra momba ny hazo fijalian'i Kalvary. Ho fantatsika ny hevitry ny hoe mandray anjara amin'ny fijalian'i Kristy. Hanery antsika ny fitiavan'i Kristy ary na dia tsy afaka hanazava ny fomba hanafanan'ny fitiavan' Kristy ny fontsika aza isika dia haneho ny fitiavany amin'ny fanoloran-tena mafana ho amin'ny asany.
Maneho amin'ny fiangonan'i Efesôsy amin'ny teny mazava indrindra ny hery sy ny fahalalana mahatalanjona ananany amin'ny maha-zanakalahy sy zanakavavin'ny Avo Indrindra i Paoly. "Hohatanjahina fatratra" izy ireo, "hamaka sy hiorina mafy amin'ny fitiavana" ary "hahalala ny fitiavan'i Kristy izay mihoatra ny fahalalana" (...)
Jehôvah Imanoela — Ao Aminy no iafenan'ny haren'ny fahendrena sy ny fahalalana rehetra — mba hiray fo Aminy, hanana Azy arakaraka ny isokafan'ny fo handray ny Toetrany: mba hahalala ny fitiavany sy ny heriny, mba hanana ny haren'i Kristy tsy hita lany (...) izany no lovan'ny mpanompon'i Jehôvah, ary ny "fahamarinany avy amiko, hoy Jehôvah ." Isa. 54:17. — OHC, t. 365.