"Fa avy aminy no nanaovana anareo ho ao amin'i Kristy Jesôsy, Izay nataon'Andriamanitra fahendrena sy fahamarinana sy fahamasinana ary fanavotana ho antsika." - 1 Kôr. 1:30.
Mofon'Aina:
Ny fitomboana amin'ny fahalalana ny toetran'i Kristy no manamasina ny fanahy. Manova ny olona izay misaintsaina ny amin'ny drafi-pamonjena ny fibanjinana sy ny fankasitrahana ny asa fanavotana mahatalanjona. Rehefa mibanjina an'i Kristy izy dia manjary manahaka Azy, avy amin'ny voninahitra ho amin'ny voninahitra (...). Tonga dingana manandratra sy manamboatra azy ny fibanjinana an' i Jesôsy. (...) Ny hanana ny fahatanterahan'i Kristy no fanirian'ny Kristianina. (...) Aoka hisaintsaina momba an'i Kristy mandrakariva. Izao no ambaran'ny anjely momba Azy: "ary ny anarany hataonao hoe Jesôsy; fa Izy no hamonjy ny olony ho afaka amin'ny fahotany." - Mat. 1:21. Jesôsy, Mpamonjy sarobidy! Ao Aminy no misy toky sy fanampiana, fiarovana ary fiadanana. Izy no mpandroaka ireo fisalasalantsika rehetra, ilay fanantenantsika lehibe indrindra. Endrey, mamy loatra ny fieritreretana fa azontsika atao ny ho tonga mpiray amin'ny fomban'Andriamanitra, ary azontsika atao ny mandresy tahaka izay nandresen'i Kristy! I Jesôsy no fahatanterahan'ny fanantenantsika. (...) Izy no rano velona ho an'ny fanahy mangetaheta. Izy no Fialofana rehefa mifofofofo ny tafio-drivotra. Izy no fahamarinantsika, fanamasinana ary fanavotana antsika.
Ny herin'i Kristy no tokony ho fampaherezana, fanantenana, satroboninahitry ny fifalian' izay rehetra manaraka an'i Jesôsy eo amin'ny ady sy ny tolona atrehiny eo amin'ny fiainana. Izay manara-dia marina ilay Zanak'ondrin'Andriamanitra izay manaisotra ny fahotan'izao tontolo izao dia afaka ny hihiaka toy izao raha eo am-pandrosoana: "ary ny fandresena izay enti-maharesy izao tontolo izao dia ny finoantsika." - 1 Jao. 5:4.
Finoana toy ny ahoana moa no mandresy an'izao tontolo izao? Finoana izay manao an'i Kristy ho Mpamonjin'ny tenanao manokana izany - finoana izay miaiky ny tsy fahafahana manao na inona na inona sy ny tsy fahafahana mamonjy ny tena (...), ka mifikitra amin' ilay Mpanampy manana hery hoenti-mamonjy ho hany fanantenany. Finoana izay tsy mety sasatra izany, izay mandre ny feon'i Kristy manao hoe: "Mahereza, efa nandresy izao tontolo izao Aho, ary anao ny Heriko." (...) "Indro Aho momba anareo mandrakariva." - TMK, t. 166.