"Fa isaorana anie Andriamanitra Izay manome antsika ny fandresena amin'ny alalan'i Jesôsy Kristy Tompontsika." - 1 Kôr. 15:57.
Mofon'Aina:
Tsy misy olona marefo sy miankin-doha indrindra mihoatra noho ny fanahy izay mahatsapa ny maha-tsinontsinona azy ka miantehitra tanteraka amin'ny fahamendrehan'ny ran' ilay Mpamonjy voahombo sy nitsangana tamin'ny maty. Fiainana feno ady ny fiainan'ny Kristianina; ahitana fifanandrinana mandrakariva izany. Ady mivaivay sy dia lavitra izany. Kanefa ny fankatoavana an' i Kristy rehetra, ny fandavan-tena rehetra noho ny Aminy, ny fitsapana rehetra iaretana, ny fandresena ny fakam-panahy rehetra, dia dingana iray eo amin'ny dia lavitra mankamin'ny voninahitr'ilay fandresena farany.
Raha ekentsika ho Mpitarika antsika i Kristy, dia hitarika sy hiaro antsika eo amin'ilay lalan-tery Izy. Mety ho sarotra sy feno tsilo ny lalana, mety mideza sy mampidi-doza ny fiakarana, mety hisy hantsana eo ankavia sy ankavanana, tsy maintsy hisetra zava-tsarotra angamba isika eo amin'ny dia lavitra izay atao, mety tsy maintsy hanohy ny asa mafy isika na dia maniry fitsaharana aza, mety tsy maintsy miady isika na dia trotraka aza, mety asaina manantena isika rehefa kivy, kanefa rehefa i Kristy no Mpitari-dalana dia tsy ho diso lalana isika raha ho any amin'ilay fiainana tsy misy fahafatesana ary ho tratrantsika ilay fitodiana nirina fatratra.
I Kristy mihitsy talohantsika no efa nandia izany lalana mikitoantoana izany, ary efa nandamina azy hizoran'ny tongotsika. Ny lalan-terin'ny fahamasinana izay asaina andehanan'ireo navotan'i Jehôvah , dia hazavain'Ilay Fahazavan' izao tontolo izao. Rehefa manaraka ny dian-tongony isika, dia hamirapiratra eo amintsika ny Fahazavany, ary raha maneho taratra ny fahazavana indramina amin'ny voninahitr'i Kristy isika, dia hihamazava hatrany tahaka ny antoandro izany lalana izany.
Mety heverintsika ho mahafinaritra amin'ny voalohany ny mandeha araka ny avonavona sy ny hambom-pon'izao tontolo izao, saingy alahelo sy fahoriana no hiafaran'izany. Mety haneho fampanantenana manintona ireo drafitra feno fitiavan-tena ary mampanantena fifaliana, kanefa ho hitantsika fa feno poizina izany fifaliantsika izany ary ho feno ngidin'ny fanantenana izay miorina amin'ny "izaho" ny fiainantsika. Voaro isika rehefa manara-dia an' i Kristy satria tsy hamela ny herin'ny maizina hikasika na dia ny singam-bolontsika aza Izy. Hotandremany ireo izay nankinina taminy, ary hihoatra noho ny mpandresy isika amin'ny alalan'ilay tia antsika. TMK, t. 253.