"Ary hahalala ny fitiavan’i Kristy, izay mihoatra noho ny fahalalana, mba hamenoana anareo ho amin'ny fahafenoan'Andriamanitra rehetra." - Efes. 3:19.
Mofon’Aina:
Maro no mieritreritra fa tsy azo atao ny mandositra ny herin'ny fahotana, kanefa ny fampanantenana dia ny hamenoana antsika amin'ny fahafenoan'Andriamanitra rehetra. Ambany loatra ny fikendrentsika kanefa avo dia avo ny marika tokony hotratrarina. Tokony hivelatra ny saintsika, mba hahatakarantsika ny hevitry ny fiahian'Andriamanitra. Tokony hitaratra ny toetra ambony indrindra ananan'Andriamanitra isika. Tokony ho velom-pisaorana isika fa tsy navela handeha amin'ny herintsika manokana. Fenitra ambony tokony hotratrarintsika ny Ialàn'Andriamanitra. (...) Tsy tokony handeha araka ny fiheverantsika manokana isika (...) fa hanaraka ny dian-tongotr'i Kristy.
Eo an-tanantsika ny fandresena kanefa tsy handresy amin'ny anarantsika manokana isika na ny herintsika, satria tsy haintsika ny hitandrina ny lalàn'Andriamanitra amin'ny herintsika. Tsy maintsy manampy antsika amin'ny fahalementsika ny Fanahin'Andriamanitra. Efa tonga fanatitra sy antoka ho antsika i Kristy. Tonga ota ho antsika Izy mba hahatonga antsika ho fahamarinan'Andriamanitra ao Aminy. Amin'ny finoana ny Anarany no ampitafiany antsika ny Fahamarinany ka tonga fitsipika velona eo amin'ny fiainantsika izany. (...)
Ampitafian' i Kristy antsika ny toetrany tsy manana ota ary amin'ny fahadiovany no itondrany antsika eo amin'ny Ray. Tsy haintsika ny hanana ny akanjom-pahamarinana amin'ny herintsika, satria hoy ny mpaminany hoe: "tahaka ny lamba mihosin-dra ny fahamarinanay" - Isa. 64:5.
Tsy manana na inona na inona azo atafy ny fanahintsika isika mba tsy hisehoan'ny fitanjahantsika. Tsy maintsy mandray ny akanjom-pahamarinana notenomina tany amin'ny fanenoman'ny lanitra isika, dia ilay akanjom-pahamarinan'i Kristy izay tsy misy pentina. Izao no tokony holazaintsika: "Efa maty ho ahy Izy. Nitondra ny fahafaham-baraka nahazo ahy Izy, mba ho tonga mpandresy noho ny Anarany aho ary hasandratra ho eo amin'ny seza fiandrianany."
Tombontsoa ho an'ny zanak'Andriamanitra ny ho fenon'ny fahafenoan'Andriamanitra rehetra. "Ary ho an’izay mahay manao mihoatra noho ny zavatra rehetra, eny, mihoatra lavitra noho izay rehetra angatahintsika na heverintsika aza, araka ny hery izay miasa ato amintsika, ho Azy anie ny voninahitra ao amin'ny fiangonana sy ao amin'i Kristy Jesôsy hatramin'ny taranaka farany indrindra mandrakizay mandrakizay." - Efes. 3:20,21 - TMK, t. 302.