"Ary ny finoana no fahatokiana ny amin'ny zavatra antenaina, fanehoana ny zavatra tsy hita." — Heb. 11:1.
Mofon'Aina:
Tsy ny finoana no fototry ny famonjena antsika, kanefa fitahiana lehibe kosa izy -maso mahita, sofina mandre, tongotra mamindra, ary tanana mihazona. Fitaovana ny finoana fa tsy tanjona farany. Raha nanolotra ny ainy ho famonjena ny mpanota i Kristy, nahoana moa aho no tsy handray izany fitahiana izany? Ny finoako no mihazona izany, ary amin'izany ny finoako no fahatokiako ny amin'ny zavatra antenaiko, fanehoana ny zavatra tsy hita. (...) Amin'ny alalan'ny finoana, io ilay finoana mahavonj y (...), ny fanahin'ny olona no manolo-tena tanteraka hofehezin'i Jesôsy Kristy. Mitoetra ao amin'i Kristy izy ary i Kristy mitoetra ao amin'ny fanahiny amin'ny finoana, sy manapaka ao. Apetrak'ilay mpino eo an-tanan'Andriamanitra ny tenany sy ny fanahiny, ary afaka milaza amin-toky izy hoe: `Hain'i Kristy ny mitahiry izay napetrako Taminy ho amin'ilay andro iray.' Ho voavonjy mandrakizay izay rehetra manao izany. Misy toky ho an'ny fanahy izay voasasan'ny ran'i Kristy sy voatafy amin'ny fahamarinany ary sarobidy eo imason'i Jesôsy.
Tadidio fa anisan'ny fomba fanamafisana ny finoana ny fampiasana azy. Raha mipetraka lalandava ianao ka tsy mihetsika mihitsy, dia halemy ny hozatrao, ary ny rantsam-butanao ho osa ka tsy ho afa-mihetsika intsony. Marina koa izany eo amin'ny fanandramana ara-pivavahana. Tsy maintsy mino ireo teny fikasan'Andriamanitra ianao. (...)
Tena zava-dehibe indrindra ho antsika ny manao izay hahatonga ny fanahintsika ho voahodidin'ny rivo-piainan'ny finoana. Manapa-kevitra ny amin'izay ho anjarantsika mandrakizay isika isan'andro, miankina amin'ny rivo-piainana manodidina antsika. Samy hampamoahina isika tsirairay ny amin'izay asehontsika amin'ny hafa, fa misy vokany tsy hitantsika maso ny teny sy ny asa ataontsika. Raha ho namonjy an'i Sôdôma Andriamanitra noho ny fisian'ny olona folo marina, ho tsara hanao ahoana re ny vokatra raha ny vahoakan'Andriamanitra, dia izay rehetra mitondra ny anaran'i Kristy, no mahatoky sy mitafy ny fahamarinany e? — HP, t. 104.