"Sambatra izay olona mahita fahendrena sy izay olona mahazo fahalalana." - Ohab. 3:13.
Mofon'aina:
Ny fahatahorana an'i Jehôvah no fiandoham-pahendrena, ary ny olona manaiky hovolavolaina sy hotefena araka ny endrik'Andriamanitra no mendrika indrindra amin'ny asan'ny tanan'Andriamanitra. (...)
Ny fahalalana ny fahamasinana avy amin'ny fanandramana iainana, amin'ny alalan'ny fanoloran-tena ho amin'ny fanompoana an'Andriamanitra isan' andro no miantoka ny fanabeazana ambony indrindra ho an'ny saina sy ny fanahy ary ny tena. (...) Rehefa miezaka amin'ny fo marina isika mikatsaka fahendrena, ka manao izay fara-fahaizantsika hanomezam-boninahitra an'Andriamanitra sy hanampiana ny namantsika, dia omen'Andriamanitra antsika ny heriny. Avy amin'Andriamanitra avokoa ireny fahaizana ireny fa tsy avy amintsika; talenta nomen'Andriamanitra mba hampiasaintsika ho fanompoana Azy no tokony handraisantsika izany.
Tokony horaisina ho fahefana ambony kokoa mifehy ny tena ny saina sy ny fahaizana nomen'ny lanitra azy. Mila alefitra eo ambanin'ny fifehezan'ny eritreritra sy ny faharesen-dahatra ara-panahy ny fironana sy ny filana ao anatintsika.
Tsy mba mampitotongana izay mandray azy velively ny fivavahan'i Jesôsy Kristy, na mahatonga azy ho ratsy na henjam-piteny, na tsy hahalala fomba, na hanandra-tena, na ho mora tezitra, na ho mafy fo. Ny mifanohitra amin' izany, mahatonga ny olona hanana fironana tsara izany, manamasina ny fandanjalanjan'ny sainy, manadio sy manao izay mahamendrika ny fieritreretany amin'ny famaboana azy ho an'i Jesôsy Kristy.
Ambony lavitra noho izay mety hiheveran'ny olona azy ny idealin'Andriamanitra ho an'ny zanany. Nomen'Ilay Andriamanitra velona ao amin'ny lalàny ny fanehoana mazava ny toetrany. I Jesôsy no mpampianatra lehibe indrindra, ary tsy misy toa Azy eran'izao tontolo izao. Ary inona ny fenitra natao hotratrarin'izay rehetra mino Azy? "Aoka ho tanteraka hianareo toy ny fahatanterahan 'ny Rainareo Izay any an-danitra. " —Mat. 5:48. (...) Ny toetra tahaka ny an'i Kristy no idealin'ny toetra kristianina. Misy lalana mitondra ho amin'ny fandrosoana tsy mitsahatra misokatra eo anoloantsika. Manan-tanjona sy fenitra hotratrarina isika, dia izay tsara sy madio sy mendrika ary ambony. Aoka hisy ezaka mitohy sy maharitra handrosoana ho amin'ny fahatanterahan-toetra. — HP, t. 141.