« Namelatra rahona ho fialokalofana Izy ary afo ho fanazavana nony alina. »Sal. 105:39.
Mofo Naina:
“Ary Jehovah nandeha teo alohany tamin’ny andri-rahona raha antoandro hitari-dalana azy, ary tamin’ny andri-afo nony alina ho fahazavana ho azy, handehanany andro aman’alina.” — Eks. 13:21 (...) Nandroso nizotra teo ambany fanevan’ny Mpitarika tsy hita maso ny Isiraely. Ny antoandro, dia ny rahona no nanazava ny diany sy nanarona ireto vahoaka toy ny eloelo teo amboniny ary ny hatsiatsiakany no nanalefaka ny fandoroan’ny hainandro ny tany efitra. Niova ho andry afo izany tamin’ny alina ka nanazava ny toby sy nanamafy ny fanatrehan’Andriamanitra tsy tapaka.
Mitantara ny fiahian’Andriamanitra ny olony amin’ny ady lehibe farany ifanaovana amin’ny herin’ny ratsy i Isaia raha nilaza ny andri-rahona sy ny andri-afo, ao amin’ny teny tena soa sy feno fiononana indrindra ao amin’ny faminaniana nosoratany: ‘Ary Jehovah hamorona rahona sy setroka raha antoandro sy fahazavan’ny afo midedadeda nony alina. Ho eny ambony fitoerana rehetra any an-tendrombohitra Ziona, sy ho eny ambonin’ny fivoriany rehetra, ary eny ambonin’ny voninahitra rehetra dia hisy eloelo, ka hisy trano-lay ho fialokalofana amin’ny hainandro raha antoandro ary ho fialofana sy fierena amin’ny tafio-drivotra sy ny ranonorana’. – PM, t. 281.
Amin’ny fotoan’ny fitsapana dia nampanantena Andriamanitra fa hanisy fiarovana ho an’ireo izay nitandrina tamim-paharetana ny teniny. Hambaran’i Kristy amin’ireo mahatoky Aminy ny teny hoe: “Mandehana, ry oloko, midira ao amin’ny efi-tranonao, ary mirindrina varavarana ianao, ka miere kely indray mipi-maso monja mandra-pahalasan’ny fahatezerana.” – Isa. 26:20.
Ny Lion’ny Joda, izay mahatahotra ho an’ireo mandà ny fahasoavany, dia ho Zanak’ondrin’Andriamanitra ho an’ireo mpankatô sy mahatoky. Ny andri-rahona dia ho fanehoam-pahatezerana sy tahotra amin’ny mpandika ny lalàn’Andriamanitra, fa ho fahazavana sy famindram-po ary fanafahana kosa ho an’ireo izay mitandrina ny didiny. Ilay sandry mahery mamotika ny mpikomy dia matanjaka hanafaka ireo mandeha amim-pahitsiana. Hangonina tokoa ireo mahatoky. “Ary amin’ny ampammpnenoana mafy ny trompetra dia haniraka ny anjeliny Izy, ary hangonin'ireo ny olom-boafidy avy amin’ny vazan-tany efatra hatramin’ny faravodilanitra rehetra.” – Mat. 24:31. – CC, t. 91.