« Andeha isika hiakatra mihitsy mba hahazoantsika azy, fa haharesy azy tokoa isika.» Nom. 13:30b.
Mofo Naina:
Ny finoan’i Kaleba an’Andriamanitra no nanome herim-po azy, izay (...) nahatonga azy hijoro am-pahasahiana sy tsy nisy tahotra amin’ny fiarovana ny marina. Avy amin’ny loharano avo toy izany no tsy maintsy nandraisan’ny Jeneralin’ny tafiky ny lanitra, sy ireo miaramila marin’ny hazo fijalian’i Kristy rehetra, hery sy fahasahiana handresena ireo sakana izay toa tsy azo ihoarana matetika (...) Ireo izay manao ny adidiny dia tsy maintsy vonona mandrakariva hanambara ny teny izay omen’Andriamanitra azy, fa tsy ny teny mampisalasala, sy mahakivy ary mandiso fanantenana (...)
Na dia miresaka momba ny tsy fahafahana aza ireo mpierina, ary mihorohoro ny eritreriny ny amin’ny rindrina avo sy ny olona goavam-be, dia avelao i Kaleba mahatoky izay manana “fanahy hafa”, no ho eo anoloana. Ny fahamarinan’Andriamanitra, izay mitondra famonjena no hoentina any amin’ny vahoaka raha toa ka tsy mahafehy ny lalany ireo mpanompo sy mpino izay nanao fanekena, toy ny nataon’ireo mpisafo tany tsy nahatoky (...)
Ny zotom-po sy ny hery no tsy maintsy hamafisina. Ireo talenta izay harafesina vokatry ny tsy fampiasana azy no tsy maintsy manosika ho amin’ny asa. Ny feo izay mety hiteny hoe: “Andraso, aza avela hisy enta-mavesatra eo aminao”, dia feon’ireo mpisafo tany saro-tahotra. Mila Kaleba isika amin’izao fotoana izao, izay afaka hitarika ny Isiraely miaraka amin’ny teny feno fanantenana, mba hanao tatitra mafonja ho an’ny hetsika avy hatrany. Rehefa miezaka mafy ny hitakemotra ireo olona tia tena, mora mitsiriritra, mora azon-tahotra ka mihorohoro eo anatrehan’ireo goavam-be sy ny rindrina tsy azo ihodivirana, dia avelao ho re ny feon’ireo Kaleba, na dia efa vonon-kitora-bato aza ireo kanosa noho ny fanambarana mahatoky ataony.
Amin’ y fanaovan’ireo tsy mino tsinontsinona ny Tenin’Andriamanitra no iantsoana ireo Kaleba mahatoky. Amin’izay fotoana izay izy ireo dia hiorina mafy amin’ny tolon’ny adidy, tsy misy fireharehana, ary tsy miverin- dalàna noho ny fankahalana. Ireo mpisafo tany tsy mpino dia niomana hamono an’i Kaleba. Nahita ny vato teo an-tanan’ireo izay nanao tatitra diso izy, nefa tsy nahasakana azy izany; nanana hafatra izy ary hitondra izany. Io toe-tsaina io ihany no hiseho amin’ireo izay marina amin’Andriamanitra ankehitriny. – CC, t. 107.