"Jehôvah dia ao amin’ny tempoliny masina; Mangìna eo anatrehany, ry tany rehetra!" — Hab. 2:20.
Mofon’aina:
Nahita seza fiandrianana aho, ary ny Ray sy ny Zanaka no nipetraka teo amboniny. Nodinihiko ny endrik'i Jesôsy ary talanjona aho nahita ny hatsaran-tarehiny. Tsy afaka nahita ny endriky ny Ray aho satria nisy rahona mazava be voninahitra nanarona Azy. Nanontaniako i Jesôsy raha mitovy endrika Aminy koa ny Ray. Dia nanaiky Izy, kanefa tsy azoko natao ny nibanjina Azy satria hoy Izy: "raha vantany vao mandinika ny voninahitry ny tavany ianao, na indray mandeha aza, dia ho ringana tokoa." (...)
Hitako ny Ray nitsangana avy teo amin'ny seza fiandrianana, nitaingina kalesy afo, niditra tao amin'ny efitra masina indrindra, ary nipetraka. (...) Avy eo dia nisy kalesy rahona nanana kodiarana afo sy voahodidin'ny anjely nanatona ny toerana nisy an'i Jesôsy. Niditra tao amin'ilay kalesy i Jesôsy ary nentina ho ao amin'ilay efitra masina indrindra izay nisy ny Ray. Nobanjiniko teo i Jesôsy, Ilay Mpisoronabe lehibe, nijoro teo anatrehan'ny Ray.
Nisy kerobima tsara tarehy nijoro teo amin'ny andaniny roan'ny fiaran'ny fanekena, ireo elany nivelatra teo amboniny, ka ny tendrony dia nifampikasoka teo ambonin'ny lohan'i Jesôsy raha nijoro teo anoloan'ny rakotra fanaovam-panavotana Izy. Nifampitodika ireo kerobima roa ireo, ary ny tavan'izy ireo niondrika teo amin'ny fiaran'ny fanekena, nisolo tena ny tafiky ny anjely izay mibanjina amim-pahalianana ny lalàn'Andriamanitra. Nisy lovia volamena fandoroana ditin-kazo manitra teo anelanelan'ireo kerobima roa, ary rehefa tonga eo amin'i Jesôsy ny vavaka ataon'ireo olo-masina amim-pinoana, ka entin'i Jesôsy eo anatrehan'ny Ray, dia misy setroka mani-pofona misandratra avy eo amin'ilay fandoroana ditin-kazo, miloko maro mahafinaritra indrindra. Nisy voninahitra mazava mahajambena teo ambonin'ilay toerana nijoroan'i Jesôsy (...).
Mifona ho antsika eo anatrehan'ny Ray, eo amin'ny seza fiandrianan'ny fahasoavana, Ilay Tompontsika nohomboana teo amin'ny hazo fijaliana. Azontsika italahoana famelan-keloka, fanamarinana, fahamasinana, ny sorona nataony ho fanavotana antsika. Ilay Zanak'ondry voavono no hany fanantenana ho antsika. Miandrandra mijery Azy ny finoantsika, mamikitra Aminy Izay mahavonjy antsika tanteraka, Ilay ankasitrahan'ny Ray ny hanitry ny fanatitra nateriny indray mandeha. — GAG, t. 71.