"(...) Fitiavana mandritra ny fotoana tsy voafetra no itiavako anao. Izany no antony nisarihako anao, ka ny hatsaram-panahiko feno fitiavana no nentiko nanintonana anao." — Jer. 31:3 (DIEM).
Mofon’aina:
Notafian'ny Tompon'ny aina sy ny voninahitra tamin'ny maha-olombelona ny maha-Andriamanitra Azy mba hanehoana amin'ny olona fa to hampifandray antsika Aminy Andriamanitra amin'ny alalan'ny fanomezany an'i Kristy. Tsy mety hisy fahasambarana raha tsy misy fifandraisana amin'Andriamanitra. Natao ho fantatry ny olombelona lavo fa tsy afa-po ny Raintsika any an-danitra raha tsy manatratra ny mpanota mibebaka ny fitiavany, izay manova azy amin'ny alalan'ny fahamendrehan'Ilay Zanak'ondrin'Andriamanitra tsy misy kilema.
Ho amin'izany tanjona izany ny asan'ireo anjelin'ny lanitra. Natao hiasa hanatanteraka ny baikon'Ilay Lehibeny izy ireo, hitady ny very, dia ireo izay tafasaraka tamin'Andriamanitra noho ny fandikan-dalàna. Nisy drafitra novolavolaina mba ho hitan'izao tontolo izao ny fahasoavana sy ny fitiavana mahagagan'i Kristy. Tao amin'ny vidiny tsy manam-petra naloan'ny Zanak'Andriamanitra ho fanavotana ny olona no nisehoan'ny fitiavan'Andriamanitra. Ampy hamonjena izao tontolo izao manontolo io drafi-panavotana be voninahitra io. Azo atao ho tanteraka ao amin'i Jesosy Kristy ny olona mpanota sy lavo amin'ny alalan'ny famelana ny helony sy ny fanisana ho azy ny fahamarinan'i Kristy.
Tamin'ireo asa soa rehetra nataon'i Jesosy dia nezahiny ny hampahafantatra antsika ny toetran'ny Ray miahy sy mikarakara ny zanany. (...) Tian'i Jesosy ho takatsika ny fitiavan'ny Ray ary amin'ny fahasoavan'ny maha-Raintsika Azy no isarihany antsika ho eo Aminy. (...)
Tonga haneho ny fitiavan' Andriamanitra amin'izao tontolo i Kristy mba hitaomany ny fon'ny olona rehetra ho Aminy. (...) Ny dingana voalohany mankamin'ny famonjena dia ny famaliana ny fitiavan'i Kristy misarika antsika. (...) Ny mba hahafantaran'ny olona ny fifalian'ny famelan-keloka sy ny fiadanan'Andriamanitra no isarihan'i Kristy azy ireo amin'ny fanehoam-pitiavany toy izany. Raha manaiky hotaominy izy ireo ka manolotra ny fony hiasan'ny fahasoavany, dia hitarika azy ireo tsikelikely ho amin'ny fahalalana Azy amin'ny fahafenoany i Kristy, ary izany no fiainana mandrakizay. — GAG, t. 99.