"Matokia an 'i Jehovah ianao, ka manaova soa, dia honina amin'ny tany ianao ka ho faly amin'ny fahamarinana." - Sal. 37:3.
Mofon’aina:
Matokia an'i Jehovah." Ny andro rehetra dia samy misy fahoriana, fanahiana ary fahasahiranana ao aminy avy, hany ka rehefa sendra tafahaona isika, dia vonona miaraka amin'izay hiresaka ny fahasahiranana sy ny zava-manjo antsika. Manjary tafiditra ny fahoriana sy ny tahotra be, ary (...) velon'eritreritra sy ahiahy ny olona izay mandre antsika, ka manjary mihevitra fa tsy manana Mpamonjy be indrafo sy feno fitiavana izay vonon-kihaino ny fangatahana rehetra ataontsika isika (. • .).
Matahotra sady mihorohoro lalandava ny olona sasany. Isan'andro vaky izao izy dia hodidinin'ny zava-mampiseho ny fitiavan'Andriamanitra, ary mifaly amin'ny hatsaran'ny fitondrany, nefa hamaivaniny izany fitahiana hita maso izany. Ny sainy dia miorina lalandava amin'ny zavatra tsy mahafinaritra izay atahorany ho tonga, na fahasahiranana izay mety hisy tokoa, izay na dia kely ihany aza, dia mahajamba ny masony amin'ny zavatra maro tokony hahabe fisaorana. Ny fahasahiranana izay mihatra aminy, dia tsy mba mampanatona azy an'Andriamanitra (...) fa vao mainka
mampisaraka azy Aminy kosa, satria mainka mahatonga tsy fahatokiana sy fimonomononana aminy ireny.
Ranadahy sy rahava:vy, tokony haneho tsy finoana tahaka izany ve isika? Nahoana moa isika no tsy hankasitraka sy haneho tsy fitokiana? Sakaizantsika i Jesôsy. Maniry ny hahasambatra antsika ny lanitra manontolo; ary mampalahelo ny Fanahy Masin'Andriamanitra ny tebiteby sy ny tahotsika. (...) Tsy tokony hisy toerana homena izany tsy fitokiana an'Andriamanitra izany, izay mitarika antsika hanao ho laharam-pahamehan'ny fiainana ny fiomanana ho amin'ny fahasahiranana ho avy, toy ny hoe ao amin'ny zavatry ny tany no misy ny fahasambarantsika (...).
Angamba very hevitra amin'ny raharaha ianao, mihamaizina ny fanantenanao, ary matahotra ny fatiantoka ianao. Na izany aza, aza kivy, apetraho amin'Andriamanitra ny fanahianao (...). Mangataha fahendrena mba hanaovanao ny raharahanao araka izay mety, dia tsy hisy fatiantoka sy faharavana (...). Efa nampanantena hanampy i Jesôsy raha mety miezaka isika. - TDG, t. 42.