Vakio ny Sal. 58:6-8; Sal. 69:22-28; Sal. 83:9-17; Sal. 94:1,2; sy ny Sal. 137:7-9. Inona ny fihetseham-po ampitaina ao amin'ireo Salamo ireo? Iza no voalaza fa mpitsara ao?
Misy Salamo sasany miantso an’Andriamanitra hanao valifaty amin’ny olona sy ny firenena izay mikasa hanisy ratsy na efa nanao ratsy tamin’ny mpanao Salamo na ny iray firenena aminy. Toa somary mahasakodiavatra ihany ireo Salamo ireo noho ny fiteny henjana ampiasainy sy ny toa fifanoherany amin’ny foto-kevitra ara-Baiboly momba ny fitiavana ny fahavalo (Mat. 5:44).
Rariny kosa anefa ny fahatezeran’ny mpanao Salamo eo anatrehan’ny fampahoriana. Midika izany fa mandray am-po kokoa ny amin’ny tsara sy ny ratsy, mihoatra noho ny olona maro hafa, ny mpanao Salamo. Manahiran-tsaina azy ireo tokoa ny ratsy atao eto amin’izao tontolo izao, tsy amin’ny tenany ihany fa amin’ny hafa koa.
Kanefa na aiza na aiza ao amin’ny Salamo dia tsy ahitana ny mpanao Salamo maneho ny tenany ho ilay mpanao valifaty. Apetrany eo an-tanan’Andriamanitra kosa ny famaliana. Ampahatsiahivin’ny Salamo ireo ozona ao amin’ny faneken’Andriamanitra (Deo. 27:9-16) ary mangataka amin’Andriamanitra izy hiditra an-tsehatra araka ny teny fikasan'ilay fanekeny.
Tsy voatery ho vavaka ataon’ilay mpanao Salamo fotsiny ny Salamo, fa manambara faminaniana momba ny fitsaran’Andriamanitra ho avy koa izany. Maneho ny fitsaran’Andriamanitra an'i Babilôna ny Sal. 137, araka ny hita ao amin’ny bokin’ireo mpaminany. Ny fandravana sy ny fandringanana nataon’ireo Babilônianina tamin’ny firenen-kafa dia hanody azy ireo. Mivoy ny fampitandremana ataon’Andriamanitra ny Salamo, manao hoe: tsy ho afa-maina amin’izao mandrakariva tsy akory ny ratsy.
Mifamatra amin’ny fahamarinany sy ny fahasoavany ny famalian'Andriamanitra. Antsoina hivavaka ho an’ireo izay ratsy fitondra azy ny zanak’Andriamanitra, eny, natao haniry ny fiovam-pon’ireo aza izy (Sal. 83:18; Jer. 29:7).
Saingy na miezaka hampifanaraka ireo Salamo ireo amin’ny foto-kevitry ny Baiboly momba ny fitiavana ny fahavalo aza isika, dia tsy maintsy mitandrina mba tsy hanamaivamaivana ireo fanandramam-pahoriana ambara ao. Fantatr'Andriamanitra ny fahoriana manjo ny zanany ary omeny toky izy ireo hoe: “Zava-dehibe eo imason’i Jehovah ny fahafatesan’ny olony masina.” – Sal. 116:15. Mahatonga ny olona tsy hahay hangina manoloana izay rehetra mety ho faharatsiana ny fitsaran’Andriamanitra ka hitady ny fanjakan’Andriamanitra amin’ny fahafenoany. Manome teny ho eo am-bavan’ireo mijaly koa ny Salamo, ka mampahafantatra azy ireo fa mihevitra ny fahoriany Andriamanitra, ary indray andro any dia ho tonga ny fitsarana araka ny rariny.
Iza no tsy efa nieritreritra na nanam-paniriana hamaly faty ireo izay nanisy ratsy lehibe azy na ny havan-tiany? Ahoana no mety hanampian'ny Salamo anao hanana fomba fijery araka ny tokony ho izy momba izany fihetseham-po izany?