Vakio ny Sal. 18:3-18; Sal. 76:3-9,12; sy ny Sal. 144:5-7. Ahoana no anoritsoritana an'i Jehovah ao amin'ireo andininy ireo? Inona ny hevitra ampitain'ireo sary an'ohatra ireo momba ny fahavononan'Andriamanitra hanafaka ny olony?
Midera an'Andriamanitra ireo hira ireo noho ny heriny mahatalanjona izay nandreseny ny herin'ny ratsy nampitahotra ny olony. Soritany ho Mpiady sy Mpitsara Andriamanitra ao anatin'ny voninahiny. Matetika no aseho ho Mpiady Andriamanitra ao amin'ny Salamo, izay mampivohitra ny fidiran'Andriamanitra an- tsehatra faingana sy amin'ny fomba mahery vaika rehefa mitaraina sy mijaly ny olony.
"Dia nampikotroka tany an-danitra Jehovah,/ ny Avo Indrindra niloa-peo,/ havandra sy vainafo./ Dia nandefa ny zana-tsipikany Izy ka nampiely ny fahavaloko;/ Ary nampandeha helatra be ka nampifanaritaka azy./ Dia hita ny mason-drano,/ ary niseho ny fanambanin'ny tany/ noho ny teny mafy nataonao, Jehovah ô,/noho ny fifofofofon'ny fofonain'ny vavoronao."- Sal. 18:13-15.
Ny fahavononan'Andriamanitra sy ny fahalehibiazan'ny asany dia tokony hampisava ny fisalasalana rehetra momba ny fikarakaran'Andriamanitra sy ny fiantrany ireo mijaly, na momba ny fahafahany mandresy ny fahavalo. Ny miandry azy hanao izany no hany anjarantsika.
Raha ny marina, na dia mandray anjara ao anatin'ny ady aza ny olon'Andriamanitra, toa an'i Davida, dia tsy avy amin'ny fahaizan'ny olona no ahazoana ny fahafahana. Nidera an'Andriamanitra i Davida tamin'ireo ady maro nifanaovany tamin'ireo fahavalon'ny vahoakan'Andriamanitra, satria Izy irery ihany no nahazoany ny fandresena rehetra. Mora ho an'i Davida ny naka ny voninahitra ho an'ny tenany noho ny fahombiazany sy ny fandresena maro azony, saingy tsy izany no fomba fisainany. Fantany tsara hoe avy aiza ny loharanon'ny heriny.
Na milaza aza i Davida fa mampianatra ny tanany hiady Andriamanitra (Sal. 18:34), dia tsy hita na aiza na aiza ao amin'ny Salamo ny hoe: niankina tamin'ny fahaizany miady izy. Andriamanitra kosa no niady ho an'i Davida sy namonjy azy (Sal. 18:47,48).
Fantatra amin'ny maha-mpiady mahay azy ny mpanjaka Davida ao amin'ny Salamo, ary mpitendry mozika havanana koa izy, izay nidera an'Andriamanitra amin'ny maha-hany Mpanafaka sy Mpamelona ny vahoakany (Sal. 144:10-15). Ny fiderana an'Andriamanitra sy ny fivavahana Aminy no loharanon-kerin'i Davida, izay mahery vaika lavitra noho ny fitaovam-piadiana hafa rehetra. Andriamanitra irery no natao hitokiana sy hiankohofana.
Na toy inona na toy inona fanomezam-pahasoavana sy fahaizana anananao ary fahombiazana azonao teo amin'ny fiainana, nahoana no tsy azonao hadinoina izay niavian'izany rehetra izany? Inona ny loza mananontanona anao raha sanatria hadinonao izany?