Vakio, ny Sal. 119:1-16, 161-168. Manao ahoana no tokony ho fitandremantsika ny didin'Andriamanitra, ary inona avy ireo fitahiana azo avy amin'izany?
Soritan'ny Baiboly toy ny dia miaraka amin'Andriamanitra eo amin'ny lalan'ny fahamarinana ny fiainana isan'andro amim-pinoana. Ny fandehanana "araka ny lalàn'i Jehovah" - Sal. 119:1 sy "amin'ny fahazavan'ny tavany" - Sal. 89:6 no mihazona hatrany ny fiainam-pinoana. Tsy lalana roa samy hafa ireo tsy akory. Ny fandehanana amin'ny fahazavan'Andriamanitra dia midika ho fanandratana ny lalàn'Andriamanitra. Toy izany koa, ny fandehanana "araka ny lalàn'i Jehovah" dia midika ho fitadiavana an'Andriamanitra amin'ny fo rehetra (Sal. 119:1,2,10).
Fomba iray ilazan'ny Salamo ny fiainam-pahamarinana koa ny hoe "mahitsy làlana"-Sal. 119:1. Ny hoe "mahitsy" eto dia avy amin'ny teny hebreo midika hoe: "tsy misy kilema", izay miresaka momba ny fanatitra ankasitrahan'Andriamanitra (Eks. 20:12:5). Toy izany koa, ny fiainan'ny olo-marina, izay "fanatitra velona" - Rôm. 12:1, dia tsy tokony ho voapentin'ny fitiavam-pahotana. "Làlana marina" koa no iantsoana ny fiainana natokana ho an'Andriamanitra, izay midika fa mandeha amin'ny lalana tsara, ankasitrahan'Andriamanitra ilay olona (Sal. 101:2,6; jereo koa ny Sal. 18:32).
Midika ho "fahalalana tsara" ny marina sy ny diso, ary ny tsara sy ny ratsy, ny fitandremana ny didin'Andriamanitra, fa tsy fitadiavam-pamonjena amin'ny alalan'ny asa velively (Sal. 111:10; jereo koa ny 1 Tant. 22:12), ka mahakasika ilay olona manontolo izany fa tsy asa ivelambelany fotsiny. Tsy azo sarahina eo amin'ny fiainana ny hoe "mahitsy" na "tsy misy kilema", sy ny fitandremana ny didin'Andriamanitra, ary ny fitadiavana an'Andriamanitra amin'ny fo rehetra (Sal. 119:1,2).
Fanambarana ny sitrapon'Andriamanitra amin'izao tontolo izao ny didin'Andriamanitra. Mampianatra ny olona ny fomba hananam-pahendrena sy hananana fiainam-pahafahana sy fiadanana izany (Sal. 119:7-11, 133). Miravoravo amin'ny lalàna ny mpanao Salamo satria ny lalàna no ahazoany antoka fa mahatoky tokoa Andriamanitra (Sal. 119:77,174).
"Be fiadanana izay tia ny lalànao, ary tsy misy mahatafintohina azy." Sal. 119:165. Manambara fitondrantena ratsy ny fahatafintohinana eto. Miaro antsika amin'ny fakam-panahy ny Tenin'Andriamanitra (Sal. 119:110), tahaka ny fanazavana mitsilo ny dian'ny mpanao Salamo (Sal. 119:105).
Ahoana no nanehoan'i Kristy ny herin'ny Tenin'Andriamanitra teo amin'ny fiainany (Mat. 4:1-11)? Tokony hilaza inona amintsika izany momba ny hery ananan'ny fo vonona hankatò ny lalàn' Andriamanitra?