Ny Salamo dia manohana amin'ny fomba tsy azo hozongozonina ny foto- pinoana momba ny maha-Mpanjaka an'Andriamanitra. Andriamanitra no namorona sy mihazona ny zavatra rehetra izay noforoniny. Izy no Mpanjakan'izao tontolo rehetra izao, ary manapaka ny tany amin'ny fahamarinana sy ny rariny Izy. Tsara ny lalàny sy ny fitsipiny ary mitondra fiainana ho an'izay mitandrina azy. Mpitsara marina ny Tompo; ataony izay hitoeran'izao tontolo izao anatin'ny filaminana ary manao izany Izy amin'ny famalian-tsoa ny marina sy ny famaizana ny ratsy fanahy; amin'ny fotoany anefa fa tsy amin'izay fotoana mety amintsika.
Mitana anjara toerana manokana eo amin'ny fiarovana an'izao tontolo izao ny fanekena nataon'Andriamanitra tamin'ny Isiraely satria mitory ny famonjen'i Jehovah izany. Noraisin'Andriamanitra ho fananany sarobidy indrindra ny Isiraely ka nataony ho vahoakany ambonin'ny firenena rehetra. Mahatoky amin'ny fanekeny ny Tompo ary mitohy ny fiahiany ny andian'ondriny na dia eo aza ny tsy fahatokian'izy ireo sy ny fikomiany miharihary indraindray.
Araka izany, ny fanapahana sy ny fanjakan'Andriamanitra no mampitoetra an'izao tontolo izao sy maha-mafy orina azy. Tian'ireo mpanao Salamo ho takatry ny mpamaky izany fahamarinana fototra izany. Izany fomba fijery izany no ataon'ireo mpanao Salamo fanilo raha eo am-pikatsahana ny hitombo sy hanompo an'Andriamanitra amin'ny fanoloran-tena tanteraka izy ireo.