Vakio ny Sal. 3:4; Sal. 14:7; Sal. 20:1-3; Sal. 27:5; Sal. 36:8; Sal. 61:4; sy ny Sal. 68:5,35. Araka ireo lahatsoratra ireo, avy aiza ny famonjena?
Ao anatin'ny tontolon-kevitry ny fitoerana masina no tena ahitana fiarovana ara-nofo sy ara-panahy. Toerana ahitana fanampiana, fiarovana, ary famonjena ny fitoerana masina. Manome fialofana ho an'ny ory ny fitoerana masina. Avy ao amin'ny fitoerany masina no iarovan'Andriamanitra ny kamboty sy ny mpitondratena, ary anomezany hery ho an'ny vahoakany. Rehefa mamirapiratra avy ao Ziona, izay tena fahatsaran-tarehy, Andriamanitra (Sal. 50:2), dia ankalazaina ny fitsarana marina ataony ary mirotsaka ny fitahian'Andriamanitra (Sal. 84:4; Sal. 128:5; Sal. 134:3).
Mihoatra lavitra noho ny fiarovana hita any an-toeran-kafa eto an-tany ny fiarovana omen'ny fitoerana masina satria Andriamanitra mihitsy no mitoetra ao. Ny fanatrehan'Andriamanitra no mitondra fiarovana fa tsy ilay tempoly sy rafi- trano tsy akory. Toy izany koa, na dia tendrombohitra tsy dia manao ahoana loatra aza i Ziona dia nihoatra noho ny tendrombohitra hafa rehetra izy satria ny Tompo no nonina tao (Sal. 68:15, 16; Isa. 2:2).
"Fa isika tsy manana mpisoronabe izay tsy mahay miara-mitondra ny fahalementsika, fa Izay efa nalaim-panahy tamin'ny zavatra rehetra tahaka antsika, kanefa tsy nanana ota. Koa aoka isika hanatona ny seza fiandrianan'ny fahasoavana amin'ny fahasahiana, mba hahazoantsika famindrampo sy hahitantsika fahasoavana ho famonjena amin'izay andro mahory."- Heb. 4:15,16. Mifanindran-dalana amin'izay lazain'ny mpanao Salamo momba ny fitoerana masina ireo andininy ireo; amin'ny fomba ahaoana?
Ny fahamasinan'ny fitoerana masin'Andriamanitra no mampiaiky ny mpanao Salamo fa mpanota avokoa ny olona rehetra ary tena tsy mendrika nyfankasitrahan'Andriamanitra; ambarany koa fa mifototra amin'ny fahatokian'Andriamanitra sy ny fahasoavany irery ihany ny fanavotana (Sal. 143:2, 9-12). Tsy misy na inona na inona ao amintsika ka maha- mendrika antsika eo anatrehan'Andriamanitra. Tsy afaka mahazo antoka ny amin'ny fanavotan'Andriamanitra ny olona raha tsy manana fifandraisana amin'Andriamanitra amim-pahamarinana, amin'ny alalan'ny fibebahana sy ny fanekena ny fahasoavan'Andriamanitra ary koa ny famelany heloka. Maneho ny famonjena izay ao amin'i Jesôsy ny fanompoana atao ao amin'ny fitoerana masina.