Vakio ny IFM, toko 81: "Nitsangana ny Tompo", sy ny toko 86: `Mandehana any amin'ny firenena rehetra".
"Ho an'ny mino, dia fitsanganana amin'ny maty sy fiainana Kristy. Tafaverina ao amin'ny Mpamonjintsika ny fiainana izay very noho ny fahotana; manana fiainana ao Aminy izy mba hamelomana izay tiany. Nomena Azy ny zo hanolotra fiainana mandrakizay. Ny fiainana izay napetrany teo amin'ny maha-olombelona, dia raisiny indray ka homeny ny olombelona. lzaho avy mba hananany fiainana, sady hananany be dia be. Fa na iza na iza no misotro ny rano izay homeko azy dia tsy hangetaheta intsony mandrakizay fa ny rano izay homeko azy dia ho loharano miboiboika ao anatiny ho fiainana mandrakizay'. lzay mihinana ny nofoko sy misotro ny rako no manana fiainana mandrakizay; ary Izaho hanangana azy amin'ny andro farany.' —Jao. 10:10; 4:14; 6:54."
"Ho an'ny mino, dia zavatra kely ihany ny fahafatesana. Fotoana fohy no ilazan'i Kristy an ‘izany. 'Raha misy olona mitandrina ny teniko, dia tsy mba hahita fahafatesana izy mandrakizay'. Ho an'ny Kristiana, torimaso fotsiny ny fahafatesana, fotoana ao anatin'ny fanginana sy ny haizina. Ny fiainana dia miara-miafina amin'i Kristy ao amin'Andriamanitra, ary raha hiseho Kristy fiainantsika, dia hiara-miseho aminy koa amin'ny voninahitra hianareo." — Jao. 8:51,52; Kôl. 3:4."— IFM, tt. 845,846.
Na ireo mpahay tantara tsy mino an'Andriamanitra aza, ireo izay tsy mety manaiky ny fahamarinan’ny fitsanganana amin'ny maty, dia miaiky fa novonoina tokoa i Jesôsy, ary tsy izany ihany fa taorian'ny fahafatesany dia marobe ny olona nilaza ho nahita an'i Kristy efa nitsangana tamin'ny maty. Dia toy izany no nanombohan'izy ireo naminavina ny fototra niaingan'ny fiangonana kristianina. Ny sasany miezaka manazava ny antony itorian'ny Kristianina izany amin'ny hoe: nanana rahalahy kambana taminy i Jesôsy ka nandroroa ny mason'ny mpianatra, nihevitra fa i Jesôsy no hitany. Ny hafa indray milaza fa tsy tena maty i Jesôsy fa torana fotsiny, ary avy eo novelomina taty aoriana. Ary nisy anankiray koa nilaza fa nisy mponina ivelan'ny tany naka ny fatin'i Jesôsy. [Azonao jerena ny ao amin'ny Risen: Finding Hope in the Empty Tomb, nosoratan'i Clifford Goldstein, (Empty Tomb (Nampa, Idaho: Pacific Press, 2021), ahitanao ny mombamomba ireo tohan-kevitra rehetra ireo, sy ny mahatonga izany tsy hitombina.]
FANONTANIANA hifanakalozan-kevitra
1. Inona ny antony mety ho nandaingan’ny mpianatra momba ny fitsanganan'i Jesôsy tamin'ny maty? Raha ny fantatsika hatreto aloha dia fankahalana, fanilikilihana, ary fanenjehana no nianjady tamin'ny mpianatra noho ny finoany. Inona ny mety ho tombontsoan'izy ireo amin'ny famoronana io tantara io?
2. Inona amin'ireo porofon'ny fitsanganan'i Jesôsy tamin'ny maty no maharesy lahatra anao indrindra? Zarao ao amin'ny kilasy ny hevitrao.
3. Saintsaino ny amin'ny fanantenana lehibe atolotry ny fitsanganan'i Jesôsy amin'ny maty ho antsika. Vakio ny 1 Kôr. 15. Manao ahoana ny lanja omen'i Paoly ny fitsanganan'i Jesôsy tamin'ny maty.