Hodinihana mandritry ny herinandro:
Mar. 2:1-3:6, Mika 6:6-8, 1 Sam. 21:1-6, Mar. 3:20-35, Lio. 12:53, Lio. 14:26.
Tsianjery:
"Ary hoy Izy taminy: Ny Sabata no natao ho an'ny olona, fa tsy ny olona ho an'ny Sabata; ka dia Tompon'ny Sabata aza ny Zanak'olona." Mar. 2:27,28.
Misy tantara dimy nanaovan'i Jesôsy fampianarana ao amin'ny Mar. 2:1- Mar -3:6, izay mifanohitra amin'ny fampianaran'ireo mpitondra fivavahana tamin'izany. Manaraka lamina voafaritra ireo tantara ireo, ka ny tantara tsirairay dia mifandray amin'ny tantara eo alohany, ary ny tantara farany dia mifandray amin'ny voalohany.
Samy mampiseho ny maha-lzy an'i Jesôsy ireo tantara ireo, araka ny asongadina ao amin'ny Mar. 2:10,17,20,28.
Hiditra lalina amin'ny hevitr'ireo tantara ireo sy ny fanambaran'i Jesôsy ao anatiny ny fianarantsika amin'ny Alahady, Alatsinainy, ary Talata.
Ny lohahevitra hodinihina ao amin'ny lesona Alarobia sy Alakamisy kosa dia ny ao amin'ny Mar. 3:20-35.
Ho hitantsika koa ny anankiray amin'ny fomba fanoratr'i Marka ny Filazantsara, dia ilay antsoina hoe: "Sandwich Story" (izany hoe manomboka amin'ny tantara A izy, avy eo manisika tantara B, izay vao faranany ilay tantara A). Inenina, farafahakeliny, no ampiasan'i Marka io fomba io ao amin'ny bokiny. Ary isaky ny manao izany izy dia mifantoka amin'ny lafin-toetran'i Jesõsy iray sy ny anjara asany amin'ny maha-Mesia Azy, na mifantoka amin'ny toetry ny maha-mpianatra.
Hamaky tantara vitsivitsy momba an'i Jesõsy isika amin'ity herinandro ity ary hijery ny lesona azontsika raisina avy amin'izany.