Hodinihina mandritra ny herinandro: Sal. 23; Jao. 10:11-15; Sal. 22; Sal. 89:27-32; Kôl. 1:16; Sal. 2; Heb. 7:20-28.
Tsianjery: "Ny vato izay nolavin'ny mpanao trano no efa tonga fehizorom Indrindra. Avy tamin'i Jehovah izany ka mahagaga eo imasontsika." - Sal. 118:22,23.
Mijoro ho vavolombelon'i Kristy sy ny asany ny Salamo. Saika hita ao amin'ny Salamo avokoa ny lafiny rehetra amin'ny Asany ao amin'ny drafi-panavotana. Amin'ny fomba samihafa no anaovan'ny Salamo fanambarana mialoha momba ny fiainan'i Kristy sy ny asany, ary matetika izany no voafaritra mazava tsara.
Hita ao amin'ireo lohahevitra resahin'ny Salamo ny maha-Andriamanitra an'i Kristy, ny maha-Zanaka Azy, ny fankatoavany, ny hafanam-pony mikasika ny tempolin'Andriamanitra, ny maha-Mpiandry ondrin'Andriamanitra Azy, ny namadihana Azy, ny fahoriany, ny taolany tsy notapahina, ny nahafatesany, ny nitsanganany amin'ny maty, ny niakarany any an-danitra, ny maha-Mpisorona sy Mpanjaka Azy. Hita ao avokoa izany, araka izay nanambarana azy taonjato maro lasa talohan'ny nahatongavan'i Jesôsy ho nofo.
Tsy mahagaga, ohatra, ny nanambaran'i Jesôsy momba ny Salamo rehefa niresaka ny amin'ny asa fanompoany tamin'ireo mpianatra Izy raha teny an- dalana ho any Emaosy (Lio. 24:44). Niriny ny hahitan'ireo mpianatra ireo ao amin'ny Salamo ny porofon'ny maha-Izy Azy.
Anisan'ny Salamo ahitana tandindona izay tanteraka ao amin'i Kristy ny Sal. 24, 45, 72 ary ny 101 (Ilay Mpanjaka sy Mpitsara tsara indrindra), ny 88 sy ny 102 (vavaka ataon'ilay mpanompon'Andriamanitra ory).
Hitantsika ao amin'ny Salamo rehetra, amin'ny alalan'ny fitarainan'ny mpanao Salamo sy ny fisaorany ary ny fiderany sy ny fitalahoany rariny sy fanafahana, ny akon'ny vavaka ataon'i Kristy mba ho famonjena an'izao tontolo izao.