Vakio ny Mar. 9:30-41. Inona no mampiavaka ny filazan'i Jesôsy fanindroany ny hahafatesany sy ny hitsanganany indray (ampitahao amin'ny Mar. 8:31)? Ary momba ny inona no niadian'ny mpianatra hevitra? Inona no nampianarin'i Jesôsy azy ireo?
Tamin'ny nilazan'i Jesôsy voalohany ny amin'ny hahafatesany sy ny hitsanganany amin'ny maty dia niresaka momba ireo izay handà sy hamono Azy Izy. Ny filazana fanindroany nataony kosa dia mikasika ny fomba hamadihana Azy. Tsy notondroina izay hamadika Azy tamin'io fotoana io, saingy ny mpamaky dia efa mahalala izany satria voaresaka ao amin'ny Mar. 3:19 ny amin'i Jodasy. Naverin'i Jesôsy indray fa hovonoina Izy ary avy eo hitsangana rehefa afaka hateloana. Toa vao maika aza Iatsaka noho ny tamin'ny voalohany ny fahalianan'ny mpianatra ny amin'ireo tsipiriany momba io faminanian'i Jesôsy io. Ny vaovao tsy mahafaly rahateo tsy mba atao anton-dresaka.
Nankany avaratry ny Ranomasin'i Galilia i Jesôsy ao amin'ny Mar. 8:27, tany amin'ireo tanàna tany Kaisaria-Filipo. Namaky an'i Galilia kosa Izy ao amin'ny Mar. 9:30; ary ao amin'ny Mar. 9:33 dia tonga tao Kapernaomy Izy. Koa tsy sarotra ny maminavina ny diany avy any avaratra mankany atsimo. Niditra irery tao Kapernaomy izy, fa ny mpianatra kosa nitaredretra tany aoriany. Rehefa tonga tao an-trano i Jesôsy dia nanontany ny mpianany momba izay niadian'izy ireo hevitra teny an-dalana. Tsy nisy nahateny izy ireo; marika izany fa tsy nampahazo aina azy ireo ilay lohahevitra, tahaka ny ankizy kely tratra sy mahafantatra fa nanao hadalana. Ny amin'izay lehibe indrindra no niadian'izy ireo hevitra. Ao an-tsain'ny olona rehetra io lohahevitra io, na dia vitsy ihany aza no miaiky izany. Mifamadika tanteraka amin'izay heverin'ny olona anefa ny ao amin'ny fanjakan'Andriamanitra.
Novahan'i Jesôsy indroa miantoana izany olana izany. Voalohany, nambarany mazava fa raha misy te ho voalohany, dia hatao farany amin'izy rehetra sy ho mpanompon'izy rehetra izy. Avy eo dia naka ohatra velona i Jesôsy mba hanazavana izany. Mazava loatra fa nisy ankizy kely koa teo amin'ny manodidina teo nihaino an'i Jesôsy. Dia naka zaza iray i Jesôsy ho eo afovoan'izy ireo. lnoana fa natahotahotra ilay zaza noho izany, kanefa notrotroin'i Jesôsy izy mba hampitonena ny tahony. Dia nampianatra Izy fa izay rehetra mandray zaza dia mandray Azy, ary izay mandray Azy dia mandray ny Ray. Araka izany, na ny zaza madinika indrindra aza dia mifandray amin'Andriamanitra.
Nametraka fanontaniana momba ireo izay tsy anisan'ny vondron'ny mpianatra i Jaona, ary lesona manan-danja lehibe no nampianarin'i Jesôsy hoe: "Fa izay tsy manohitra antsika dia momba antsika." — Mar. 9:40. Nohamafisininy Tompo fa izay manampy amin'ny asa fanompoana ataon'ny Kristianina, na dia amin'ny zavatra bitika aza, dia tsy mba ataon'ny lanitra tsinontsinona.
Inona ny fahalehibiazana araka ny Baiboly, izay mifanipaka amin'ny fahalehibeazana araka izao tontolo izao? Iza amin'ireo karazana fahalehibeazana ireo no katsahinao?