Vakio ny Jao. 14:1-3. Inona ny tontolon-kevitra nilazan'i Jesôsy ireo teny ireo?
Milaza i Jesôsy any amin'ny faramparan'ny Jao. 13 fa tsy maintsy handeha (Jao. 13:3). Nampametra-panontaniana an'i Petera izany ka hoy izy: "Tompoko, hankaiza moa Hianao?"-Jao. 13:36. Tsy takatry ny mpianatra fa ny fahafatesany, ny fitsanganany amin'ny maty, ary ny fiakarany ho any an-danitra no noresahin'i Jesôsy. Nilaza i Petera fa vonona ny hahafoy ny ainy ho Azy izy (Jao. 13:37), ary teo no nanambaran'i Jesôsy mialoha ny handavan'i Petera Azy (Jao. 13:38).
Tao anatin izany tontolon-kevitra izany no nampaherezan'i Jesôsy ny mpianatra mba tsy halahelo (Jao. 14:1). Nadika avy amin'ny teny grika hoe tarasső ny hoe "malahelo" eto, izay midika koa hoe mangitakitaka, mivarahontsana, mitebiteby, very hevitra. Tsy mahagaga raha nanahiran-tsaina ny mpianatra ny tenin'i Jesôsy.
Kanefa mba hampitony ny tahotr'izy ireo dia niresaka ny amin'ny tranon'ny Rainy i Jesôsy, izay misy fitoerana maro (tsy trano mitsitokantokana fa toy ny efitrano ao amin'ny trano iray lehibe fandraisam-bahiny). Handeha hanomana ny toerana handraisana azy ireo i Jesôsy. Ny any ankoatra ilay ady sarotry ny hazo fijaliana no noresahin'i Jesôsy, dia rehefa hiverina hanavotra ny olony Izy. Miandrandra ilay fotoana hahafoana tanteraka ny fahoriana vokatry ny fahotana Izy (jereo ny Dan. 7:27).
Hoy i Jesôsy: "Raha handeha (...) Aho, dia ho avy indray ka handray anareo ho any amiko, ka izay itoerako no hitoeranareo koa." - Jao. 14:3. Mazava tsara fa teny fikasana ny amin'ny fiaviany fanindroany izany.
Ahoana no maha-azo antoka izany teny fikasana izany? Hamaly ny maro hoe: tsy maintsy tanteraka ny faminanian'ny Baiboly, ary marina tokoa izany. Kanefa ao amin'ny Jao. 14:3 dia misy antony hafa. Ao amin'ity andininy ity, ny hoe "ho avy Aho" dia amin'ny filazam-potoana ankehitriny amin'ny teny grika ("tonga Aho"). Filazam-potoana fampiasa amin'ny teny grika izy io, izay entina ilazana ny hoavy amin'ny fomba azo antoka, toy ny efa mitranga sahady. Araka izany dia marina ny fandikana io fehezan-teny io hoe: "Azo antoka tokoa fa ho avy indray Aho".
Tsy fahatanterahan'ny faminanian'ny Baiboly fotsiny ny fiverenan'ny Tompontsika, izay fototry ny fanantenantsika. Miorina kokoa amin'ny fitokiantsika amin'llay Lehilahy nanao ny teny fikasana izany. Nilaza Izy fa azo antoka tokoa ny fiverenany haka ny olony. Mahazo matoky izany teny fikasana izany isika noho ny amin'llay nilaza izany.
Inona no ampianarin'ny hazo fijaliana antsika momba ny maha-azo antoka ny fiavian'i Kristy fanindroany? Raha tsy misy ny fiverenan'i Jesôsy fanindroany, inona no nilantsika ny fahafatesan'i Jesôsy tamin'ny fiaviany voalohany?