Vakio ny HM, "Fanafahana ny vahoakan' Andriamanitra", toko 40.
"Tamin'ny andro rehetra Andriamanitra dia nanampy sy nanafaka ny vahoakany tamin'ny alalan'ny anjely masina. Nandray anjara mivantana tamin'ny asa aman-draharahan'ny olombelona ireo mponina any an-danitra ireo. Nitafy fitafiana mamirapiratra tahaka ny helatra ny fahitana azy; naka endrik'olona koa, nitafy toy ny mpivahiny. Nisy anjely niseho tamin'ny endrik'olombelona tamin'ny olon'Andriamanitra. Niala sasatra izy, tahaka ny olona vizana, teo ambanin'ny hazo öka tamin'ny mitataovovonana. Nanaiky hiantrano tao amin'ny tokantranon'ny olona izy. Nanao ny asan'ny mpitari-dalana izy tamin'ny olona tratr'alina teny am-pandehanana. Ny tanan'izy ireny mihitsy no nandrehitra ny afo teo amin'ny alitara. Namoha ny varavaran'ny tranomaizina izy ka nanafaka ny mpanompon'i Jehovah. Nitafy ny fiadian'ny lanitra izy ka tonga nanakodia ny vato teo amin'ny fasan'ny Mpamonjy.
"Matetika ny anjely no maka ny endrik'olombelona manatrika ny fivorian'ny olo-marina; mitsidika koa ny fivorian'ny ratsy fanahy izy, tahaka ny nataony tany Sodoma, mba hanamarihany izay hitan'ny masony, hamantarany na efa nihoatra ny fatran'ny faharipon'Andriamanitra izy ireny. Mifaly amin'ny famindrampo i Jehovah, ary noho ireo olom-bitsy izay nanompo Azy marina, dia ferany ny loza ary ampaharetiny ny fiadanan'ny olona marobe. Tsy tsapan'ny mpanota manohitra an'Andriamanitra firy fa miankina amin'ireo olom-bitsy mahatoky izay mahafinaritra azy ny maneso azy sy mampahory azy ny fahavelomany. "-HM, tt. 657,658.
FANONTANIANA hifanakalozan-kevitra
1. Vakio ny 2 Tim. 1:7. Ifanakalozy hevitra ny amin'ireo lafin-javatra ao amin'ny faminaniana izay nampitebiteby anao indrindra. Ahoana no hialantsika amin'ny tahotra ka hananantsika fanantenana ao amin'ny hafatr'Andriamanitra, na dia milaza fanenjehana noho ny finoana aza ny faminaniana?
2. Na sarotra ihany aza ny mino amin'izao ankehitriny izao fa mety hanodidina ny Sabata sy ny Alahady avokoa ireo toe-javatra hitranga amin'ny andro farany, dia diniho ny firimorimon'ny fiovan-javatra eto amin'izao tontolo izao. Inona no ampianarin'izany antsika? Nahoana no tsy tokony hanorina ny finoantsika amin'izay mitranga ankehitriny isika, izay mety hiova tampoka, fa amin'ny Tenin'Andriamanitra irery ihany?
3. Saino izay voalaza ao amin'ny Dan. 2 (sy ny Dan. 7 koa aza). Nifandimby araka izay nanambarana azy mialoha tokoa ireo fanjakana rehetra ao. Ankehitriny, rehefa mandinika ny tantara lasa isika, dia araka izay nanambarana azy mialoha koa no nataon'ireo. Raha ny vanim-potoana iainantsika no ijerena ny faminaniana, dia fanjakana iray sisa no mbola ho avy. Iza izany fanjakana izany? Ary nahoana no mahazo matoky isika fa ho tonga tokoa izany, araka ny nanambarana azy mialoha?