NY FANENJEHANA NY FIANGONANA VOALOHANY
Tsy ny TT ihany no ahitana fanambarana mialoha ireo zavatra hitranga amin'ny andro farany fa ny TV koa. Tsy mora ny nanjo ireo Kristianina tamin'ny taonjato voalohany. Nankahalain'ny maro tamin'ireo mpiara-mivavaka aminy aloha izy ireo satria noheverina ho mandrahona ny finoan'i Mosesy. Niatrika ny fahatezeran'ny fanjakana rômanina mpanompo sampy koa izy ireo. "Niray hina ireo herin'ny tany sy ny helo mba hanohitra an'i Kristy ao amin'ny tenan'ireo mpanaraka Azy. Tazan'ny fivavahana jentilisa mialoha fa raha mandresy ny filazantsara, dia ho voarodana ny tempoliny sy ny alitarany; noho izany dia navondrony ny heriny mba handevonana ny finoana kristiana. Nirehitra ny afon'ny fanenjehana." - HM, t. 39-40.
Misy tantara ao amin'ny bokin'ny Asan'ny Apôstôly, izay mampiseho mazava ny mety hanjo ny vahoakan'Andriamanitra eo am-pirosoany ho amin'ireo toe-javatra voalaza ao amin'ny Apôk. 13.
Vakio ny Asa. 12:1-17. Inona ireo singa maneho mialoha izay hitranga amin'ny andro farany ao amin'io tantara io?
Notapahin-doha i Jakoba, ary nanakaiky koa ny anjararı'i Petera. Nomelohina ho faty ny Kristianina. Ny tena manaitra ao amin'ity tantara ity angamba dia ny torimason'i Petera, kanefa io no tokony ho alina mahatsiravina indrindra teo amin'ny fiainany - lalina tokoa ny torimasony, hany ka tsy maintsy nodonin'ilay anjely izy mba hifoha!
Nafahana tamin'ny fomba mahagaga tokoa i Petera ary nankany amin'ny toerana nivorian'ireo mpino. Saika tsy nino izy ireo fa afaka marina i Petera, na dia efa nivavaka ho amin'izany aza. Talanjona izy ireo, araka ny voalazan'ny Baiboly - mampieritreritra izany. Impiry moa isika no mivavaka kanefa avy eo tsy sahy mino akory fa hamaly ny vavatsika Andriamanitra?
Avotra ny ain'ny mpino sasany, fa ny sasany kosa maty. Toy izany koa no hitranga arakaraka ny mahantomotra ny farany. Na navotana aza i Petera tamin'io fotoana io, dia maty noho ny finoany ihany izy nony farany. Efa nambaran'i Jesosy aza ny fomba hahafatesany: "Lazaiko aminao marina dia marina tokoa: Raha mbola tanora hianao, dia nisikina ka nandeha tamin'izay tianao; fa rehefa antitra kosa hianao, dia haninjitra ny tànanao, ary olon-kafa no hanikina anao ka hitondra anao amin'izay tsy tianao. Ary izany no nolazainy hanambara ny fomban'ny fahafatesana izay hankalazany an'Andriamanitra. Ary rehefa voalazany izany, dia hoy Izy taminy: Manaraha Ahy." - Jao. 21:18,19.
Mariho fa rehefa avy nilaza tamin'l Petera ny fomba hahafatesany i Jesosy dia mbola nilaza taminy ihany hoe: "Manaraha Ahy". Inona no ambaran'izany amintsika? Nahoana no tsy tokony hanakana antsika tsy hanaraka ny Tompo na dia ny fandrahonana ho faty aza?