Nanana hafatra manokana ho an'ny vahoakan'i Ninive i Jôna. "Ary Jôna niantomboka nandeha tao an-tanána lalana indray andro ka nitory hoe: Rehefa afaka efa-polo andro, dia horavana Ninive." Jôna 3:4. Mazava ny toe-javatra eto: voaheloka ilay tanàna. Moa ve izany tsy teny nambaran'ny mpaminanin'i Jehôvah mazava? Inona anefa no nitranga tamin'i Ninive?
Vakio ny Jona 3:5-10. Nahoana no tsy tanteraka indray ilay faminaniana?
Eny tokoa, ilay tanana iray manontolo no nibebaka ka tsy nahatra taminy ny valin'ny fitsarana azy, farafahakeliny nandritra ny fotoana voafetra. "Koa namindra fo tamin'izy ireo Izy. Nankalazaina sy nomem-boninahitra teo amin'ny mpanompo sampy rehetra ny Andriamanitry ny Isiraely, ary nohajaina ny Lalány. Nampalahelo anefa, fa fotoana kely taorian'izany toe-javatra izany, dia lasa rembin'ny firenena manodidina azy i Ninive, fa nanadino an'i Jehôvah izy ka nandeha tamin'ny fiavonavonana." - MM, t. 227.
Azontsika atao ve ny miandry ny hisehoan'ny toy izany amin'ny andro farany, manoloana ny hafatra farany izay hotorina amin'izao tontolo izao lavo? Sady eny no tsia no valin'izany? Izany hoe, marobe ny olona maneran-tany izay handre ny antso hoe: "Mialà aminy hianareo, ry oloko, mba tsy hiombonanareo ota aminy, ary mba tsy hisy hahazo anareo ny loza manjo azy." - Apôk. 18:4. Manerana izao tontolo izao, dia maro ny olona hisafidy ny hanohitra ilay bibidia ka "mitandrina ny didin'Andriamanitra sy ny finoana an'i Jesôsy." - Apôk. 14:12. Tsy hianjera amin'ireny olona ireny, tahaka ireo olona tao Ninive, ny fitsarana hihatra amin'ireo izay very.
Etsy ankilan'izany, ny faminaniana sasany, tahaka ny fanambaran' Andriamanitra momba ny handravana an'i Ninive, dia misy fepetra; horavana ny tanána raha tsy miala amin'ny ratsy ireo vahoaka ireo (jereo ny Jer. 18:7-10). Misy anefa ireo faminaniana izay tsy misy fepetra manaraka azy, tsy maintsy ho tanteraka ireny na inona na inona valiny asetrin'ny olona azy. Tsy misy fepetra ny faminaniana mifandraika amin'ny fiavian'i Kristy voalohany sy faharoa, ny mariky ny bibidia, ny firotsahan'ireo loza, ny fanenjehana amin'ny andro farany; tsy maintsy hitranga ireo na inona na inona ataon'ny olombelona. Ny asa sy ny safidy ataon'ny olona kosa no hamaritra ny toerana hisy azy rehefa tonga ireo toe-javatra farany izay nambaran'ny mpaminany mialoha.
Inona no safidy ataonao ankehitriny izay mety hamaritra ireo safidy hataonao rehefa asaina mifidy ny hiankohoka amin'Andriamanitra na amin'ny sarin'ny bibidia izao tontolo Izao?