Raha ny fitiavana no fahatanterahana ny lalána, dia tsy ho voatandrintsika amin'ny fahafenoany ny lalán Andriamanitra amin'ny fiezahantsika fotsiny tsy hanao ratsy. Ny lalan'ny fitiavana mihitsy (izay hita ao amin'ny Soratra Masina manontolo) no tsy mibaiko antsika tsy hanao ratsy fotsiny. fa mandrisika antsika hanao asa izay maneho ny fitiavan'Andriamanitra amin'ny hafa koa-tsy amin'ireo mambran'ny fiangonana ihany fa amin'ny olona maneran-tany, izay tena mila ny fijoroana ho vavolombelona avy amin'ny Kristianina marina.
Vakio ny Jak. 2:9. Inona ny hafatra lehibe omena antsika eto?
Melohin'i Jakôba mafy ny tsy rariny eo amin'ny fiarahamonina eto, ka asongadiny manokana amin'izany ny fanalam-baraka ny malahelo sy ny fampahoriana ataon'ny mpanankarena sasany. Avy eo dia sarihiny ho amin'ny lalan'ny fitiava-namana ny saina, ka lazainy fa raha mankato izany lalána izany isika, dia "manao tsara" (Jak. 2:8).
Hoy i Ellen G. White: "Ny fitiavana ny olona no fisehoan'ny fitiavan'Andriamanitra eto an-tany. Ny hampitoetra io fitiavana io, ny hanao antsika ho zanaky ny fianakaviana iray no nahatonga ny Mpanjakan'ny voninahitra ho iray amintsika. Ary rehefa tanteraka ny teny nataony raha handeha Izy hoe: 'Izao no didiko, dia ny mba hifankatiavanareo tahaka ny nitiavako anareo' - Jao. 15:12; rehefa tia an'izao tontolo izao tahaka ny nitiavany azy isika, amin'izay dia tanteraka ho antsika ny asa nanirahana Azy. Vonona ho any an-danitra isika satria manana ny lanitra ao am-pontsika."- IFM, 1. 535 (ed. 2023).
Rehefa tia an'izao tontolo izao tahaka ny nitiavan'i Kristy azy isika, dia "vonona ho any an-danitra". Maneho mazava ny atao hoe mpanara-dia an'i Kristy tokoa izany!
Nandidy ny mpianany mba hifankatia tahaka ny nitiavany azy ireo i Jesõsy (Jao. 13:34). Hoy koa i Jesōsy: "Izany no ahafantaran'ny olona rehetra fa mpianatro hianareo, raha mifankatia." Jao. 13:35. Manan-danja lehibe amin'ny finoana kristianina tokoa ny fitiavana satria Andriamanitra dia fitiavana (1 Jao 4:8,16). Ary izay mitory an'Andriamanitra fitiavana dia tsy maintsy mifankatia (ampitahao amin'ny 1 Jao. 3:11; 4:20,21).
Toy izany koa, misy antso ho an'ny Kristianina ao amin'ny 1 Pet. 4:8: "Ary mihoatra noho ny zavatra rehetra, mifankatiava tsara; fa 'ny fitiavana manarona fahotana maro" (jereo koa ny Heb. 10:24 sy ny 1 Tes. 3:12).
Saintsaino ny hoe: tia an'izao tontolo izao tahaka ny nitiavan'i Kristy an'izao tontolo izao. Ahoana no anampian'izany antsika hahatakatra mazava kokoa ny atao hoe fahatanterahana kristianina, sy ny fomba hahavonona antsika ho any an-danitra? Ento eo amin'ny kilasy ny valin-teninao amin'ny Sabata.