Hodinihina mandritra ny herinandro: Eks. 35:1-36:7; Gen. 1:1; Eks. 36:8-39:31; Heb. 7:25; Eks. 40:1-38; Jao 1:14.
Tsianjery:
"Ary ny rahona nanarona ny trano-lay fihaonana, ary ny voninahitr'i Jehôvah nameno ny tabernakely. (...) Fa ny rahon'i Jehôvah dia teo ambonin'ny tabernakely nony andro, ary nisy afo teo aminy nony alina, teo imason'ny taranak'Isiraely rehetra, tamin'ny nandehanany rehetra." -Eks. 40:34,38.
Ny andraikitra fototry ny vahoakan’Andriamanitra tao amin'ny TT (tahaka ny antsika ankehitriny) dia ny miaina ao anatin'ny fifandraisana ety amin’Andriamanitra; ny miankohoka Aminy sy ny manompo Azy; ary koa. ny maneho marina ny endrik’Andriamanitra amin'ny hafa (Deo. 4:5-8).
Niafina an'Andriamanitra i Adama sy i Eva tao amin'ny Saha Edena, noho ny tahotra vokatry ny fahotan'izy ireo. Voajanahary amin'ny olombelona ny mihorohoro eo anatrehan'Andriamanitra rehefa manota, ary io tahotra io dia manova ny fomba fijerintsika ny toetrany. Ny vaovao mahafaly dia ity: Andriamanitra no manao ny dingana voalohany ho famitranam-pihavanana: noraisiny ny andraikitra hanarenana ilay fifandraisana rava. Manasa ny mpanota hiverina Aminy Izy; "Aiza moa ianao?" hoy ny antsony (Gen. 3:9).
Araka Izany, ny iraka voalohany natao hotanterahintsika dia ny maneho amin'ny manodidina antsika ny toetran'Andriamanitra sy ny asam-pitiavany ary ny fahamarinany, araka ny tokony ho izy. Rehefa voataona ho eo amin'Andriamanitra ny olona, ary resy lahatra ny amin'ny fitiavany azy tsy misy fitiavan-tena, dia hanolotra ny fiainany ho Azy izy ireo ary hankatò ny baikony rehetra, satria fantany fa mahasoa izany.
Voaporofon'ny fitoerana masina fa akaiky ny olombelona tokoa Andriamanitra, ary amin'ny alalany no nanambarana tamintsika ireo fahama-rinana lehibe indrindra, dia ny fomba amonjen’Andriamanitra izay manatona Azy amin'ny finoana.
*Famerenana ny lesona ny sabata 27 Septambra.