Hodinihina mandritra ny herinandro: Jao. 1:1-5; Gen. 1:1; Jao. 1:9-13; Jao. 3:16-21; Jao. 9:35-41; Mat. 7:21-23; Jao. 17:1-5.
Tsianjery: "Tamin'ny voalohany ny Teny, ary ny Teny tao amin'Andriamanitra, ary ny Teny dia Andriamanitra." - Jao. 1:1
Niresaka momba ny ampahany farany amin'ny filazantsaran'i Jaona ny lesona 1, izay nanazava ny antony nanoratany ny filazantsarany. Ny lesona amin'ity herinandro ity kosa dia miverina any amin'ny fiandohan'io Filazantsara io, izay ampahafantaran'i Jaona, eo ambany fitarihan'ny tsindrimandrin'ny Fanahy Masina, ny lalana tiany hitondrana ny mpamaky. Ao amin'ny teny na ny paragrafy voalohany amin'ny lahatsoratra soratany matetika no anoloran'ny mpanoratra ny TV ireo lohahevitra tian'izy ireo horesahina. Tahaka izany koa no ataon'i Jaona, ary ny lohahevitra resahiny dia asehony toy ny ampahany amin'ny drafitra iray lehibe mahafaoka an'izao rehetra izao, izay maneho ireo fahamarinana fototra mikasika an'i Jesôsy Kristy — fahamarinana izay miresaka hatramin'ny fotoana talohan'ny Famoronana.
lo fanolorana ao amin'ny fiandohan'ny boky io dia manome tombony ho an'ny mpamaky (tombony izay tsy ananan'ireo mpandray anjara ao anatin'ny boky akory aza), noho ny fahafantarany sahady ny maha-Mesia an'i Jesôsy. Hitan'ny mpamaky mazava tsara ireo lohahevi-dehibe izay iverimberenan'ilay mpanoratra ny Filazantsara eo am-pitantarana ny tantaran'i Jesôsy. Tafiditra ao anatin'ny fe-potoana ara-tantaran'ny fiainan'i Jesôsy teto an-tany ireny lohahevi-dehibe ireny.
Hanomboka amin'ny sasinteny (Jao. 1:1-18) ny lesona mandritra ity herinandro ity, ary hamintina ireo lohahevi-dehibe ao anatin'izany. Hojerentsika any amin'ny andalan-teny hafa ao amin'ny filazantsaran'i Jaona koa ireo lohahevitra ireo.