Vakio ny Eks. 7:3, 13, 14, 22. Ahoana no fahatakarantsika ireo andininy ireo?
Intsivy no anambaran'ny Eksodosy fa Jehôvah no manamafy ny fon'i Farao (Eks. 4:21; Eks. 7:3; Eks. 9:12; Eks. 10:1, 20, 27; Eks. 11:10; Eks. 14:4, 8; jereo koa ny Rôm. 9:17, 18). Intsivy koa anefa i Farao no voalaza fa nanamafy ny fony (Eks. 7:13, 14, 22; Eks. 8:11, 15, 28; Eks. 9:7, 34, 35).
lza no nanamafy ny fon'ilay mpanjaka - Andriamanitra sa izy tenany ihany (Farao)?
Mahaliana tokoa ny fitantaran'ny Eksodosy momba ireo loza folo, izay ahitana fa i Farao ihany no tompon'andralkitra amin'ny fahamafisan'ny fony teo anatrehan'ireo loza dimy voalohany. Manomboka eo amin'ny loza fahenina kosa, dia ambaran'ny lahatsoratry ny Baiboly fa Andriamanitra no nanamafy ny fon'i Farao (Eks. 9:12). Izao no hevitr'izany rehetra izany: Nohamafisin'Andriamanitra na nataony lalindalina kokoa ny safidy manokana nataon'i Farao sy ny asa nataony araka ny nahim-pony; efa nambaran'Andriamanitra tamin'i Mosesy fa hanao izany Izy (Eks. 4:21).
Raha lazaina amin'ny teny hafa, dia nandefa ireo loza samihafa Andriamanitra mba hanampiana an'i Farao hibebaka sy mba hanafahana azy amin'ny fahamaizinana sy ny fahadisoan'ny fisainany. Tsy namorona faharatsiana vaovao tao am-pon'i Farao tsy akory Andriamanitra fa navelany nitoetra tao anatin'ny fironana ho amin'ny ratsy izay efa tao anatiny rahateo i Farao. Nesoriny teo amin'i Farao ny fahasoavana izay miaro sy mamefy azy ka natolony ho amin'ny faharatsiam-panahiny ihany izy (jereo ny Rôm. 1:24-32).
Nanana safidy malalaka i Farao - azony natao ny nisafidy hiandany amin' Andriamanitra na hanohitra Azy - ary nifidy ny hanohitra an'Andriamanitra izy.
Mazava ny lesona. Efa nomena antsika ny fahafahana misafidy ny mety na ny tsy mety, ny tsara na ny ratsy, ny fankatoavana na ny tsy fankatoavana. Hatramin'i Losifera tany an-danitra ka hatramin'i Adama sy i Eva tany Edena, ary hatramin'ny Farao tany Egypta ka hatramin'izao fotoana izay iainantsika izao - na aiza na aiza isika no mitoetra, dia mifidy ny fiainana na ny fahafatesana isika (Deo. 30:19).
Indro misy sary an'ohatra iray: alao sary an-tsaina ny tara-masoandro izay miantefa eo amin'ny dibera sy ny tanimanga. Mampitsonika ny dibera izany, saingy manamafy ny tanimanga. Mitovy ihany ny hafanan'ny tara-masoandro tonga eo amin'ireo roa ireo, saingy samy hafa ny vokatr'izany eo aminlizy roa. Miankina amin'izay iantefan'izany ny vokatra miseho. Ho an'i Farao, dia azo lazaina fa niankina tamin'ny toetry ny fony manoloana an'Andriamanitra sy ny vahoakany izany.
Inona ny fanapahan-kevitra, miankina amin'ny safidy malalaka, horaisinao ao anatin'ny andro vitsivitsy ho avy? Raha fantatrao ny safidy tokony hatao, ahoana no hanomananao ny tenanao hanao izany?