Tsy nokendrena hamelezana ny Egyptianina ireo loza folo tany Egypta fa natao ho an'ireo andriamanitr'izy ireo. Namely andriamanitra iray farafahakeliny tamin'izy ireny ny loza tsirairay.
Vakio ny Eks. 7:14--8:19. Inona no niseho tamin'ny fotoan'ireo loza ireo?
Nilaza tamin'i Mosesy Andriamanitra fa ho sarotra ary mila tsy ho azo heverina akory aza ny fifampiresahana amin'i Farao (Eks. 7:14). Niriny anefa ny hampiseho ny maha-Andriamanitra Azy amin'i Farao sy ireo Egyptianina; izany no nahatonga Azy nanapa-kevitra ny hampita hafatra amin'ny fomba azon'izy ireo takarina. Handray tombontsoa avy amin'izany fifanandrinana izany koa anefa ny Hebreo satria hahazo fahalalana bebe kokoa momba ilay Andriamaniny izy.
Nokendrena hamelezana ny andriamanitry ny renirano Neily, Hapi, ny loza voalohany (Eks. 7:17-25). Niantehitra tanteraka tamin'ny rano avy tao amin'ny reniranon'i Neily ny fiainana tao Egypta. Nisy fiainana teo amin'izay nolalovan'io renirano io. Ny rano no fototry ny aina, ka namorona ny andriamaniny (Hapi) izy ireo ary niankohoka taminy amin'ny maha-mpanome fiainana azy.
Mazava loatra fa ilay Andriamanitra velona irery ihany no Loharanon'ny fiainana. Izy no Mpamorona ny zavatra rehetra, ao anatin'izany ny rano sy ny hanina (Gen. 1:1,2, 20-22; Sal. 104:27,28; Sal. 136:25; Jao. 11:25; Jao. 14:6). Maneho ny fanovana ny fiainana ho fahafatesana ny fanovana ny rano ho ra. Tsy afaka nanome fiainana sy niaro ny aina akory i Håpi; ny herin'i Jehovah irery ihany no afaka manao izany.
Nomen'Andriamanitra tombontsoa fanindroany i Farao taorian'izany. Tamin'ity indray mitoraka ity, dia i Héqet, ilay andriamanitra sahona, no niantefan'ny famelezan' Andriamanitra mivantana (Eks. 8:1-15). Tsy fiainana no nentin'ny reniranon'i Neily tamin'izay fa sahona marobe; biby izay natahoran'ny Egyptianina sy halany ary naharikoriko azy izany. Nirin'izy ireo ny hampiala ireo sahona ireo. Naseho tamin'ny fotoana katroka nialan'io loza io fa ny herin'Andriamanitra no tao ambadik'izany loza izany.
Ny loza fahatelo no nolazalazaina tamin'ny fomba fohy indrindra (Eks. 8:16-19). Tsy voafaritry ny teny hebreo "kinnim" mazava ny karazam-bibikely eto (aloy, moka, kongona, hao?). Nokendren'Andriamanitra hamelezana ny andriamanitry ny tany izay nivavahan'ny Egyptianina (Geb) izany. Avy tamin'ny vovoky ny tany (mampahatsiahy ny tantaran'ny Baiboly momba ny Famoronana) no namoahan’Andriamanitra aloy izay niely nanerana ny tany. Tsy nahavita namerina io fahagagana io ireo omblasy egyptianina (Andriamanitra irery no mahay manome aina) ka nilaza hoe: "Rantsantanan’Andriamanitra ity " - Eks. 8:19. Tsy mbola nampihontsona an'i Farao ihany anefa izany.
Eritrereto ny hamafisam-pon'i Farao. Vao mainka nanampy trotraka ny toe-javatra ny fandavany miverimberina ny fanasan Andriamanitra. Inona ny lesona azontsika raisina mahakasika ny fandavana mandrakariva ny fitaoman Andriamanitra?