Efa voalaza tany aloha ny anjara asan'i Timoty amin'ny maha mpiara-manoratra ny epistily azy (Fil. 1:1). Izao i Paoly dia manomboka mitanisa an-tsipiriany ny maha sarobidy an'i Timoty amin'ny maha mpiara-miasa aminy azy. Nolazainy fa evanjelista izy (2 Tim. 4:5) izay nirahin'i Paoly tany Makedonia (1 Tes. 3:2; ampitahao amin'ny Asa. 18:5; Asa. 19:22) ary, imbetsaka, tany Korinto (1 Kôr. 4:17; 1 Kôr. 16:10). Niasa niaraka tamin'i Paoly sy i Silasy tany Korinto izy talohan'izany (1 Tes. 1:1; 2 Tes. 1:1) ary, taty aoriana, tany Efesosy (1 Tim. 1:2,3; ampitahao amin'ny Asa 19:22). Nosoritsoritan'i Paoly ho "mitovy fanahy" aminy i Timoty (Fil. 2:20). Ny teny Grika nadika hoe "mitovy fanahy" dia manondro fa nitovy tamin'i Paoly tamin'ny lafiny maro izy, anisan'izany ny fanolorany ny tenany ho an'i Kristy, ny ezaka feno hafanam-po nitoriany ny filazantsara, ary ny fitsinjovany manokana ireo Filipianina.
Nahoana, araka ny hevitrao, no nanokana fotoana lava niresahana ny toetra tsara nananan'i Timoty i Paoly (jereo ny Fil. 2:19-23)? Inona koa no nolazain'i Paoly momba azy (jereo ny 1 Kôr. 4:17; 2 Tim. 1:5)?
Toetra iray hafa resahin'i Paoly momba an'i Timoty koa ny hoe "lehilahy voazaha toetra" (Fil. 2:22). Ny teny Grika ampiasaina eto dia mamaritra olona izay nandalo fisedrana mahamay maro (Rôm. 5:4), ary ny toetrany sy ny fanompoany dia voaporofo fa mahatoky (2 Kor. 2:9; 2 Kôr. 9:13). Fantatr'i Paoly fa marina izany momba an'i Timoty satria hitany nandritra ireo fotoana maro niarahany niasa taminy nitory ny filazantsara izany.
Ny zava-tsarotra eo amin'ny fiainana no mizaha toetra antsika sy mampiseho, marina ny ao anatintsika. Hoy i Ellen G. White momba izany: "Mitaiza ny fiainana. (...) Hisy ny fihantsiana mba hitsapana ny fahatezerana; ary amin'ny fiatrehana izany amin'ny toe-tsaina araka ny tokony ho izy no itomboan'ny Kristianina amin'ny fahasoavana. Raha zakaina amim-pahamoram-panahy ny hasomparana sy ny fanarabiana, raha valiana amin'ny teny malefaka ny teny mandratra, ary valian-tsoa ny fampahoriana, dia porofo izany fa mitoetra ao am-po ny Fanahin'i Kristy." — TFC, b. 5, t. 344. Ary mbola tohizany hoe: raha "iaretana tsara" ireo "zava-tsarotra sy fanorisorenana niantsoana antsika mba hozakaina" dia "mamolavola toetra tahaka ny an'i Kristy izany, izay mampiavaka ny Kristianina amin'ny olon'izao tontolo izao." TFC, b. 5, t. 344.
Saino ny amin'ireo fihantsiana, zava-tsarotra, sy fanorisorenana natrehinao vao tsy ela izay. Nozakainao tamim-pahamoram-panahy sy niaretanao tsara ve izany? Inona no azonao atao mba hahatonga ireny fanandramana ireny ho mpitaiza anao ho amin'ny tsara?