I Jesôsy no ohatra tonga lafatra ho antsika amin'ny zavatra rehetra, anisan'izany ny momba ny fivavahana ataon'ny tena manokana. Inona no ambaran'ny Mar. 1:35 momba ny fotoana niarahan'i Jesôsy tamin'Andriamanitra?
Na dia andininy iray monja aza izany, dia lesona manan-danja no azontsika sintonina avy amin'ny ohatra nasehon'i Jesôsy. Vao mangiran-dratsy dia efa mitokana any amin'ny toerana mangina Izy mba hiresaka amin-dRainy. Azonao an-tsaina ve izany? Indro i Jesôsy mipetraka eo amoron'ny ranomasin'i Galilia na eo amin'ny havoana iray, mivavaka sy miresaka amin-dRainy raha mbola matory ny manodidina Azy rehetra. Ny fanoloran-tenan'i Jesôsy amin'ny vavaka no tena asehon'io andininy io, nefa hitantsika mazava ao amin'izany fa laharam-pahamehana ho Azy izany. Tsy isalasalana fa izany fotoana izany no nanome Azy hery hiatrehana ny toe-javatra rehetra niainany. Raha i Jesôsy aza nila izany mialoha ny hanombohana ny andro tsirairay, mainka moa fa isika!
Hoy Jehôvah amintsika: "tadiavonareo ny tavako", ary antenainy ny hamaliantsika Azy hoe: "Eny, ny tavanao no tadiaviko" - Sal. 27:8.
Inona no ambaran'ny I Tant. 16:11 momba ny tokony hikatsahantsika ny Tavany?
Misy toerana azonao andehanana isa-maraina ve mba hiresahana amin' Andriamanitra? Mety ho seza iray manamorona ny varavarankely izany, na toerana mangina iray, na koa eo amin'ny latabatra ao an-dakozia, izay ahafahanao mipetraka isan'andro eo an-tongotr'i Jesôsy mba hianatra ny Tenin'Andriamanitra. Eo an-tongotr'i Jesôsy no toerana tsara indrindra hipetrahana (Lio. 10:39-42). Raha ataonao fahazarana isan'andro ny mankeo amin'ny toerana manokana iray mba hiresaka amin'Andriamanitra, dia ho mora kokoa aminao ny hiverina eo isan'andro. Aza kivy raha sendra tsy afaka mankeo indray andro na indroa ianao, noho ny zavatra maika tokony hovitaina. Nefa aza aveia haharitra ny fotoana tsy iarahanao amin'Andriamanitra eo. Tsarovy fa ny fananana fifandraisana maharitra amin'Andriamanitra dia fanapahan-kevitra raisina isan'andro, azonao atao ny mandray izany fanapahan-kevitra izany indray anio, raha tianao.
Hafiriana ny fotoana laninao tamin'ny vavaka sy ny famakiana Baiboly tamin'ny herinandro? Inona no ambaran'ny valinteninao momba ny fanovana mety ilaina mahakasika ny Iaharam-pahamehanao?