FANEKENA SY FANDAVANA
Manoritsoritra ny namahanan'i Jesôsy ireo olona tsy omby dimy arivo ao amin'ny Jao. 6 ny lesona 2, fa tsy voalaza ao ny ampahany farany amin'io tantara io, izay hodinihintsika eto.
Vakio ny Jao. 6:51-71, Inona no nolazain'i Jesôsy, Izay nanahiran- tsaina ny olona ny nandray azy?
Novokisan'i Jesôsy tamin'ny fomba mahagaga ny vahoaka, koa vonona izy ireo izao hanao Azy ho Mpanjaka (Jao. 6:1-15). Kanefa taty aoriana, rehefa niresaka tamin'izy ireo tao amin'ny sinagóga tao Kapernaony i Jesôsy, dia nohazavainy taminy ny hevitra ara-panahy fonosin'ilay fahagagana, ka hoy Izy: "Izaho no mofon'aina" - Jao. 6:35. Nambarany an-tsipiriany kokoa fa ny nofony io mofo io, izay omeny ho fiainan'izao tontolo izao (Jao. 6:51).
Nanokatra ny sain'ny vahoaka izany fanambarana izany fa tsy naniry ny ho mpanjakany eto an-tany i Jesôsy. Tsy nifanaraka tamin'ny fomba fisainan'izy ireo araka ny tany i Jesôsy. Tsy nanaiky hiova fo izy ireo, kanefa ho nanova ny fomba fisainany hahafantarany sy hanekeny an'i Jesôsy ho Mesia izany. Maro tamin'ireo mpianany no niala Taminy tamin'io fotoana io (Jao. 6:66).
Inoana fa mafy tamin'i Jesôsy izany, raha ny fahatsapany amin'ny maha- olombelona Azy. Mahafinaritra mantsy izany ankasitrahan'ny olona izany. Iza no tsy maniry ho mamim-bahoaka? Fa mahakivy kosa ny mahita olona maro mihataka sy misalasala manoloana ny foto-kevitry ny tena. Nony hitan'i Jesôsy fa maro no nandao Azy dia nanontany ireo mpianany akaiky Azy Izy, dia izy roambin'ny folo lahy, hoe: "Hianareo koa va mba te-hiala?" Tamin'io fotoana io i Petera no nanao izao fiaikena mahagaga izao, izay sady fanambarana izay ananan'i Jesôsy no manambara ny maha-lzy Azy koa: "Tompo ô, hankany amin'iza moa izahay? Hianao no manana ny tenin'ny fiainana mandrakizay. Ary izahay mino ka mahalala fa Hianao no llay Masin'Andriamanitra." - Jao. 6:68,69.
Efa roa taona no niarahan'ny mpianatra nandeha tamin'i Jesôsy , nahitany ny fahagagana nataony, nihainoany ny toriteniny. Fantatr'izy ireo tamin'ny alalan'ny fanandramana fa tsy misy na iza na iza azo ampitahaina Aminy. Resy lahatra izy ireo fa na hafahafa toy inona aza ny toe-javatra, na maro aza no tsy mbola takany momba ny tanjona nokendren'ity Lehilahy ity, dia Izy no Mesia. Taorian'ny nahafatesan'i Jesôsy sy ny nitsanganany tamin'ny maty vao nanomboka takatry ny mpianatra ny antony nahatongavan'i Jesôsy .
Inona ny lesona azontsika raisina avy amin'io tantara io? Matetika no diso hevitra ny ankamaroan'ny olona, sa tsy izany? Nahoana no tsy azontsika hadinoina izany, indrindra rehefa ireo lafim-pinoantsika tsy dia ankasitrahan'ny maro eny, tsy ankasitrahan'ny ankamaroan'ny Kristianina aza no resahina?