Vakio ny Jao. 1:32-36. Inona no ambaran'i Jaona eto momba an'i Jesôsy, izay tsy nampoizin'ny olona mikasika Ilay Mesia efa nandrasany ela?
Mesia hanafaka azy amin'ny fanapahan'i Rôma no nantenain'ny Jiosy. Nampahorina ela ny Jiosy ka nino fa tsy handrava fotsiny ny fahefan'i Rôma ny Mesia fa hampiorina azy ireo ho firenena lehibe sy matanjaka koa. Ny tenin'i Jaona nilaza an'i Jesôsy ho "Zanak'ondrin'Andriamanitra"anefa, na nanondro mivantana aza izany fa tsy maintsy hanao sorona ny ainy ho fanavotana Izy, dia azo lazaina fa tsy takatry ny ankamaroan'ny olona. Tsy nisy fantatr'izy ireo akory aza angamba izay nolazainy.
Noho izany dia nirin'i Jaona ny hanova ny fisainan'izy ireo momba ny Mesia mba ho hitany ao amin'i Jesôsy ny fahatanterahan'ny faminaniana momba Ilay Mpanjaka ho avy sy ny asany. Tsy tonga amin'ny maha-mpanao pôlitika na mpitari-tafika Azy Izy fa mba hanolotra ny Tenany ho sorona noho ny fahotan'izao tontolo izao. Izany no tanjony. Aorian'izany, rehefa vita ny zavatra rehetra, vao ho tonga ny fanjakany amin'ny farany (jereo ny Dan. 7:18).
Tamin'ny batisan'i Jesôsy, raha nanondro Azy amin'ny maha-Zanak'ondrin'Andriamanitra Azy i Jaona, dia nisy fahazavana vaovao izay nitosaka teo amin'ny asan'ny Mesia. Notarihina teo amin'ny tenin’ lsaia ny sain'ny mpaminany dia Ilay manao hoe: 'Tahaka ny Zanak'ondry entina hovonoina.'"— IFM, t. 96 (ed. 2023).
Hoy i Jaona mpanao batisa ao amin'ny Jao. 1:31: "izaho tsy nahalala Azy". Koa ahoana ary no nahafantarany fa i Jesôsy no Mesia? Izao no valiny: Andriamanitra Izay naniraka an'i Jaona mpanao batisa no efa nilaza taminy mialoha hoe: "Izay ho hitanao idinan'ny Fanahy sy itoerany, dia Izy no Mpanao batisa amin'ny Fanahy Masina. Ary nahita aho, ka dia nanambara fa Izy no Zanak'Andriamanitra." — Jao. 1:33,34. Izany hoe, nambaran'Andriamanitra an'i Jaona fa i Jesôsy no Mesia.
"Kristy, Izay herin'Andriamanitra sy fahendren'Andriamanitra", no voasoratra ao amin'ny 1 Kôr. 1:24. Avy amin'Andriamanitra, amin'ny alalan'ny herin'ny Fanahiny Masina mandresy lahatra, ny fahalalana an'i Jesôsy ho Kristy. Hita miverimberina ao amin'ny Jaona io lohahevitra io. Tsy avy amin'ny filôzôfia, na siansa, na fianarana ambony araka izao tontolo izao ny famonjena. Avy amin'Andriamanitra irery ihany izany, omeny izay manana fo manolo-tena amim-pinoana sy fankatoavana an'i Jesôsy.
Ahoana no mety hahafantarantsika ny fahamarinana momba an'i Jesôsy, ILay sorona nanavotana antsika, raha tsy nambara tamintsika izany? Nahoana, araka izany, no tena zava-dehibe tokoa ny fahafantarana ny Baiboly sy izay ampianariny momba an'i Jesôsy?