I Daniela dia iray amin'ireo olo-malaza lehibe ao amin'ny Baiboly. Fantatsika koa ny niandohan'ny tantarany: "Ary Daniela ninia tao am-pony tsy handoto ny tenany tamin'ny anjara-hanina avy tamin'ny hanin'ny mpanjaka"- Dan, 1:8. "Ary ireo zatovo efa-dahy ireo (Daniela sy ireo namany telo lahy) dia nomen'Andriamanitra fahalalana sy saina ny amin'ny taratasy sy ny fahendrena rehetra: ary Daniela nahafantatra ny amin'ny fahitana sy ny nofy rehetra"- Dan. 1:17. Hendry no amaritan'ny Baiboly an'i Daniela (Dan. 1:20; Dan. 2:14,21,23,48) satria tao aminy ny Fanahin'Andriamanitra (Dan. 4:15; Dan. 5:14; Dan. 6:4), ary malala indrindra eo imason'ny lanitra izy (Dan. 9:23, Dan. 10:11). Toy izany no nanoritsoritana lehilahy iray izay nanana fifandraisana matanjaka sy maharitra tamin'Andriamanitra.
Ao amin'ny Daniela 2, rehefa namoaka didy hamonoana ny olon-kendry rehetra tao Babylona ny mpanjaka Nebokadnezara, dia nangataka ny famindram-pon'Andriamanitra i Daniela momba ilay zava-miafina tao amin'ny nofin'ny mpanjaka (Dan. 2:18). Rehefa nambaran'Andriamanitra tamin'i Daniela ny nofin'ny mpanjaka, dia nivavaka avy hatrany izy.
Vakio ny Dan. 2:20-23. Nahoana i Daniela no nivavaka, ary inona no azontsika ianarana avy amin'izany vavaka izany?
Rehefa nandeha ny taona, ary mpanjaka maro no nifandirnby, dia nijanona ho mpanolotsaininy mpanjaka hatrany i Daniela, ary voalaza fa niavaka satria "nanam-panahy hendry izy; ary ny mpanjaka nikasa hanandratra azy ho lehibe amin'ny fanjakana rehetra" - Dan. 6:4. "Tsy nahita izay hiampangany azy na izay tsininy akory" ny olona - Dan. 6:4. Na teo aza ny fialonana mafy sy ny teti-dratsy (Dan. 6:5-9) avy amin'ireo mpiara-miasa taminy, dia nitoetra ho mahatoky sy tsy nanan-tahotra i Daniela teo amin'ny fiainam-pivavahany.
Vakio ny Dan. 6:10,11. Inona no ambaran'ireo andininy ireo amintsika momba an'i Daniela?
Rehefa niatrika zava-tsarotra i Daniela, dia nivavaka. Na ny ainy aza no notandindomin-doza, dia nanohy sy naharitra nivavaka izy (intelo isan'andro, araka ny fanaony), araka ny efa nanampoizana azy rahateo (teo am-baravarankely mivoha, intelo isan'andro, sady nanandrify an'i Jerosalema). Fihetsika hita maso ny vavaka nataony (nandohalika izy) ary nifantoka tamin'ny fisaorana sy ny fangatahana tamin'Andriamanitra.
Manoloana ny tantara tahaka ity, hatraiza ny maha tsinontsinona ny fialan-tsiny ataonao mba tsy hivavahana?