ALITARAM-PANAVAOZANA
Inona no nanosika an'i Josoa hanorina alitara ho an'i Jehôvah ? Vakio ny Jos. 8:30,31; ampitahao. amin'ny Deo. 11:26-30; Deo. 27:2-10.
Tamin'ny fotoana niainan'ireo patriarka, dia nanamarika ny lalan'izy ireo teo amin'ny fivahinianany ny alitara, ary tonga fanehoana azo tsapain-tanana ny fitakiany ny tany izay nampanantenain Andriamanitra azy. Izao kosa, ny fanorenan'ny Isiraelita alitara dia vavolombelon'ny fahatanterahan'ireo fampanantenana nomena ireo razany. Araka izany, ny fanorenana alitara no fahatanterahan'ireo toromarika nomen'i Mosesy mivantana (Deo. 11:26-30; Deo. 27:2-10).
Mitana anjara toerana manan-danja ny Jos. 8:30-35 eo amin'ny famolavolana ny hafatra ara-teolojian'io boky io. Ampifampitohizin'ny bokin'i Josoa ny tantara isan'ny mampivarahontsana sy feno herisetra indrindra (ny ady) sy ny fanavaozan'ny Isiraely ny fanekena nifanaovany tamin'Andriamanitra (ny fiankohofana); amin'izany no itondrany antsika hiverina eo amin'ireo lohahevitra ara-teolojia manan-danja indrindra noresahina hatrany am-piandohan'io boky io: ny hitondra ny Isiraely ho amin'ny fiainam-pankatoavana ny fanekena no iraka nampanaovina an'i Josoa (Jos. 1:7). Izany koa no sary aseho momba azy any amin'ny fiafaran'io boky io (Jos. 24).
Na dia manan-danja aza ny ady sy ny fakana ny tany Kanana, dia misy zavatra iankinana aina bebe kokoa noho izany: ny fahatokiana amin'ireo fitakian'ny lalan Andriamanitra. Tsy tanjona tsy akory ny fakana ny tany Kanana fa dingana iray ihany ao anatin'ny fanatanterahana ny drafitr'Andriamanitra ho an'ny Isiraely sy ny famerenana amin'ny laoniny ny taranak'olombelona rehetra. Ny fahatokiana amin'ireo fitsipiky ny Torah kosa no tena fototra iankinan'ny hoavin'ny taranak'olombelona. Nanao dika mitovy amin'ny lalana i Josoa; nosoratany teo amin'ny vato lehibe nolalorina sokay izany, izay samy hafa tamin'ireo vato nanaovana ny alitara (ampitahao amin'ny Deo. 27:2-8), Araka izany, ny vato izay nanoratana ny didy folo dia natao ho tsangambato manokana, teo anilan'ny alitara, mba hampahatsiahy mandrakariva an'ireo Isiraelita ny tombontsoa sy ny adidy samihafa mifandraika amin'ny fanekena.
Naneho mialoha an'ilay "Jehoshua" (Jesôsy ) ao amin'ny TV i Josoa, i Jesosy izay nomena iraka mba hitarika ny taranak'olombelona hiverina amin'ny fankatoavana an'Andriamanitra. Tsy maintsy niady tamin'ireo herin'ny ratsy Izy mba hanatanterahana izany tanjona izany. Ny hanatanteraka ireo fitakian'ny fanekena ho antsika no tanjony faratampony: "Fa na firy na firy ny teny fikasan Andriamanitra, dia ao Aminy ny 'eny', ary amin'ny alalany koa ny 'Amena', ho voninahitr'Andriamanitra amin'ny ataonay." - 2 Kôr. 1:20.
Inona avy ireo fomba fanao ara-panahy ataontsika ankehitriny izay mety manana anjara asa mitovy amin'ny fanorenana alitara fahiny?